Ubonga uSchuster ngethuba
UMLINGISI ozakhele udumo ezinhlelweni zezingane uThembalethu Ntuli (27) uthe ukusebenza nenkakha yomlingisi, uLeon Schuster efilimini entsha eqwashisa ngokubulawa kobhejane kumfundise lukhulu.
Isolezwe libe nenkulumo ekhethekile nalo mlingisi osebonakale emidlalweni eminingi , uveze ukuthi kuningi akufundile esebenza nabalingisi okukhona kubo uKhanyi Mbau noKenneth Nkosi. Ifilimu ethi Frank and Fearless, izophuma kuleli ngoLwesihlanu.
UThembalethu uzobe elingisa indawo kaFearless, okungumfana oneminyaka engu-10 ohlala nogogo wakhe epulazini elakhelene nesiqiwi. “Ngiyabonga kuLeon ngokunginika leli thuba lokuba yingxenye yale filimu ezothokozelwa yiwona wonke umuntu wakuleli.”
Uthe isifundo esiqukethwe ile filimu sizovula amehlo ezingane, zifunde okuningi ngemvelo nezilwane.
ULeon, ekhuluma neSolezwe uthe, yize eseke wamemezela ukuthi uzoshiya emkhakheni wamafilimu kodwa yinto engekho lula ukuthi ayenze. “Ngijabule ngale filimu njengoba ngisebenze nabantu abanethalente eliyisimanga futhi abakhiphe lonke ikhono labo ukuze ibe yilento eyiyona. Le filimu inamahlaya, ubugebengu kodwa okukhulu yisifundo esizosiza abantu ngabanye uma kuziwa ekubulawen kobhejane. Amahlaya yiwona agcwele kakhulu kodwa okungenze ngayenza ukubona kwanda izigameko zokubulawa kobhejane nokuyinto ebuhlungu kakhulu.”
Uthe lena ngenye yamafilimu akhe afisa ukuthi ikhonjiswe nasemazweni aphesheya.
Ebuzwa ukuthi uyacwasa yini ngokobuhlanga njengoba kwake kwaba namahlebezi anjalo ngokuziphendula umuntu omnyama, uLeon uthe wayengeke ayenze into enjalo.
“Indaba yokucwasa kuleli nasemazweni omhlaba ibucayi futhi isezinhliziyweni kwabaningi. Ngakho ngangingeke ngihlekise ngelinye ibala. Ifilimu ethi Mama Jack neZulu On My Stoep ngamanye engiziqhenya ngawo.”