Uvalo ngokuhlehla kwemingcwabo kuteleka abahlinzi
KUNGENZEKA kubhuntshe eminye imingcwabo njengoba sekungenelele abasebenzi bakwamanye amakhaza kahulumeni embhidlangweni wokuhudula izinyawo oqale emakhazeni aseFort Napier eMgungundlovu.
Umndeni wakwaKhumalo, eBulwer bekumele ungcwabe ngoMgqibelo owedlule kodwa umngcwabo wabhuntsha ngoba isidumbu sawo siduve emakhazeni ngenxa yesiteleka esiqhubekayo eFort Napier. Lo mndeni awazi ukuthi ngabe uzokwazi yini ukungcwaba kuleli sonto.
UMnuz Nkosi Khumalo indodana kaMnuz Sibangani Khumalo (62), oshone ngoMsombuluko odlule ngemuva kokuwela emlilweni eshisa imfucuza emzini wakhe, uthi abazi ukuthi bazokwazi yini ukungcwaba uyise kuleli sonto.
Uthe uyise ubenesifo sokuwa, basola ukuthi samvuka ngesikhathi eshisa imfucuza, wawela emlilweni.
“Ubaba uhlale amasonto amabili esibhedlela e-Edandale washona ngoMsombuluko odlule. Ubelimele kakhulu, besifisa ukuthi asheshe afihlwe kodwa satshelwa ukuthi njengoba elimele kanje uyefana nomuntu olimele ngengozi. Akukho ebesingakwenza, savumelana nalokho. Bengilokhu ngiya khona ngiyobuza ngitshelwe ukuthi abasebenzi basesitelekeni, bahlinza izidumbu ezimbili ngosuku,”
Ngenxa yalokhu uthe abakwazi ukutshela izihlobo ukuthi umngcwabo unini, ngaphezu kwalokho yena usephelelwe yizinsuku abenikezwe zona emsebenzini.
“Angazi ukuthi emsebenzini bazothini njengoba seziphelile izinsuku zomndeni ebebenginike zona. Ngibashayele ucingo ngachaza ukuthi sibheke nesimo esinje futhi angikwazi ukushiya ekhaya ngoba yimina okumele afihle ubaba kodwa abaphumanga nazwi ukuthi kumele ngenze njani. Ngilindele noma yini, kungenzeka bangikhombe indlela ngoba bengisanda kuqala, anginayo ilivu,” kusho yena.
NgoLwesihlanu uthe watshelwa ukuthi isidumbu sikayise singunombolo 13 ohlwini lwabazohlinzwa. Uma ebala ubona sengathi nakuleli sonto isidumbu sikayise sizobe singakahlinzwa.
Izolo kuvele ukuthi abasebenzi basemakhazeni akuGale Street (osuwaziwa ngoMagwaza Maphalala), ePinetown, ePark Rynie nasePort Shepstone nabo sebeqalile ukuhudula izinyawo.
Umsebenzi wakuGale Street ongagunyaziwe ukukhuluma nabezindaba uthe zilinganiselwa ku-32 izidumbu ezilinde ukuhlinzwa kulawa makhaza njengoba abasebenzi behlinza izidumbu ezilinganiselwa kweziyisithupha kuphela ngosuku.
“Okwamanje akukazweli noma seyikhona imindeni efikayo kodwa uma kuqhubeka isonto izofika imindeni nokuyilapho okuzoba khona nenkinga,” kusho lo msebenzi.
EPinetown kuthiwa kunezidumbu ezingu-32 ezilinde ukuhlinzwa, kuhlinzwe ezimbili ngoMsombuluko kuneziyishiyagalombili ezivame ukuhlinzwa. EPark Rynie khona kuthiwa bahlinze isidumbu esisodwa, izolo.
NgoLwesine oludlule abasebenzi basemakhazeni asePort Shepstone babike ukuthi bayagula, bangeza emsebenzi. UNobhala wenyunyana yabasebenzi, iPublic and Allied Workers Union (Pawusa), uMnuz Halalisani Gumede, uthe
bakholwa ukuthi lokhu kuyahambisana nokungenami kwabasebenzi ngezimo abasebenza ngaphansi kwazo.
Uthe abasebenzi ababeqashelwe ukuhlanza amakhaza, nokushayela izimoto asebehlinza izidumbu. Kabaholelwa ngokwenza lokhu, imiholo yabo ikhomba ukuthi basenza imisebenzi abaqashelwa yona, yize sebehlinza.
“Umnyango uyazi ngezimo abasebenzi abasebenza kuzo futhi wasayina isivumelwano sokuthi abasebenzi bazokhokhelwa ngendlela kodwa wangasigcina isivumelwano, ngoba uvikela abathile,” kusho uGumede.
Okhulumela uMnyango wezeMpilo KwaZulu-Natal, uNksz Ncumisa Mafunda uthe kuyakhathaza okwenziwa ngabasebenzi nakuchaze njengesiteleka esingekho emthethweni. Uthe isimo sibukeka sibuyele kwesijwayelekile eFort Napier.
Uthe bayaphenya ngezinhlelo zokuphazanyiswa kokusebenza kwamanye amakhaza aseKZN. Ngokusho kwakhe, izindaba ezithinta abasebenzi ziyaxoxwa ngemigudu yeNational Bargaining Council.
“UMnyango ufisa ukuqinisekisa kumalungu omphakathi ukuthi wenze izinhlelo zokuqinisekisa ukuthi izidumbu azimbondelani, uma abasebenzi beqhubeka nesiteleka bazobe bephambana nomthetho,” kusho uNksz Mafunda.