Uzobukwa ngoR3.6 m oweChiefs
AMAQEMBU aphikisayo ashaya amakhala ngoR3.6 million ozosetshenziswa uMkhandlu weTheku ngokufaka obhazabhaza abathathu bamaTV njengoba idolobha lizosingatha umdlalo owandulela owamanqamu weTelkom Knock-out phakathi kweKaizer Chiefs ne-Orlando Pirates eMoses Mabhida ngoMgqibelo.
Into ekhalisa kakhulu amaqembu aphikisayo uR3 million, ozosetshenziswa ukwenza isikhungo okuzobukwa kuso lomdlalo esizoba seBeach Front.
Ezinye izindawo ezizoba nalezi zikhungo iKwaMax eMlaza naseArtizen kwaMashu.
Kodwa e-Artizen nakwaMax bona bazothola uR200 000, ngamunye.
Umnyango wezokuThuthukiswa koMnotho eThekwini ophethwe nguMnuz Phillip Sithole ufake isicelo ekomidini elilawula umkhandlu ukuba unikezwe uR3.6 million ukuze ukwazi ukusingatha usuku lwangoMgqibelo ngempumelelo.
I-DA icele ukuphuma ukuze ibambe inguyazana yayo yomhlangano ngesikhathi sekuqalwa kudingidwa lolu daba.
USihlalo wekhokhasi yamakhansela eDA eMkhandlwini weTheku, uNksz Nicole Graham uthe bayayizwa indaba kaR200 000, ozosetshenziswa ezikhungweni zasemalokishini, wengeza ngokuthi banenkinga noR3 million ozosetshenziswa eBeach Front.
“Yini ndaba kunomehluko ongaka wemali ngesikhungo saseBeach Front nalezo ezisemalokishini?” kubuza uNksz Graham.
Uthe bafuna ukwazi futhi ukuthi ngobani abazohlomula ngalezi zikhungo.
Umholi wekhokhasi yamakhansela e-IFP, uMnuz Mdu Nkosi, ubuze ukuthi kufinyelelwe kanjani ekutheni isikhungo saseBeach Front sidinga R3 million.
UNkosi uthe bayaseseka lesi sicelo ngoba sizofukula nomnotho wasemalokisishini kodwa wathi banenkinga nemali edingeka eBeach Front.
Eziphendulela uSithole uthe, isizathu esidala ukuthi isikhungo saseBeach Front sibize kakhulu ukuthi khona ayikho ingqalasizinda kuzomele kuqalwe phansi yonke into.
“Kumele sakhe isiteji, kufakwe umsindo osezingeni nobhazabhaza weTV osezingeni eliphezulu njengoba abakwaSuperSport bezobuye basakaze bukhoma kulezi zikhungo,” kusho uSithole.
Uthe kwaMax nase-Artizen ingqalasizinda ikhona ngeke kuqhathaniswe naseBeach Front lapho kungekho lutho.
Uthe iTheku lizokwenza cishe uR140 million, ngokusingatha lo mdlalo weChiefs nePirates.
“Isizathu esidale ukuthi sifune ukusingatha lo mdlalo ukuthi ucwaningo luveza ukuthi sehlile isibalo sabavakashi abeza eThekwini,” kusho uSithole.
Izolo ntambama bese kuqaliwe ukufakwa kwezingqwembe ezikhangisa ngokuthi zizoba kuphi izikhungo okuzobukwa kuzona lo mdlalo kobhazabhaza bamathelevishini.