Balahlwe yicala abebefuna iqalwe phansi ingqungquthela ye-ANC
BUPHUME phambili ubuholi be-ANC eHarry Gwala ecaleni ebelifakwe abanganeme abebefuna iqalwe phansi ingqungquthela yalesi sifunda eyakhetha abaholi abakhona abaholwa nguSihlalo uMnuz Zamo Nxumalo.
Lokhu kuvezwe nguNobhala jikelele we-ANC, uMnuz Ace Magashule, izolo ngemuva komhlangano wekomiti elibheka ukusebenza kwansuku zonke ebelihlangene ngoMsombuluko eMpumalanga.
UMagashule uthe leli komiti lithole umbiko ngokuthi lesi sifunda siwinile enkantolo.
“Inkantolo ibachithile abebefuna ukuthi imiphumela yengqungquthela eyakhetha ubuholi eHarry Gwala ngo-Agasti nonyaka ithathwe njengento engekho. Siwutholile umbiko ngalokhu nokuthi laba abayisa lobu buholi enkantolo bayalelwe ukuthi bakhokhe nezindleko zecala,” kusho uMagashule.
Uthe ukuchithwa kwabangeneme kusho ukuthi ubuholi obukhona bunegunya lokuba sehhovisi lesifunda.
“Siyakwamukela ukusungulwa kwethimba eliholwa yisigungu esiphezulu esizosebenza nobuholi besifundazwe KwaZulu-Natal kanjalo nobuholi baseHarry Gwala. Leli thimba lizobe lihlanganisa imisebenzi ethinta ukhetho,” kusho uMagashule.
Kwenzeka lokhu nje lisusiwe ohlwini lwamacala aphuthumayo icala ebelifakwe ngowayengundunankulu waseNorth West, uMnuz Supra Mahumapelo, obeyise i-ANC enkantolo ukuze amise ubuholi besikhashana balesi sifunda ukuthi buhambise amagama abantu abaphakanyiselwe ePhalamende.
IJaji Colin Lamont lithe lolu daba aluphuthumi.
Ummeli kaMahumapelo, u-Advocate Dali Mpofu, wayefuna uLamont avimbe lobu buholi ukuthi bungahambisi amagama abantu abazoya ePhalamende ngoba ethi abaqokiwe ngabantu kodwa bafunzwa bona yisigungu esiphezulu se-ANC.
Lolu daba luzolalelwa ngoJanuwari ngonyaka ozayo.
UMagashule uthe ithimba lesigungu esiphezulu lisebenzisana nobuholi be-ANC Youth League ukulungiselela ingqungquthela engenyanga ezayo.