Ungoti uchitha i-IMF ngemalimboleko
I-INTERNATIONAL Monetary Fund (IMF) ithi iSouth African Reserve Bank (SARB) kufanele inyuse imalimboleko ukuze umnotho ukhule kahle.
I-IMF ithe ukubuyekeza izinga lokukhula komnotho obekulindeleke ukuthi ukhule ngo-1.5% kodwa osuzokhula ngo-0.7% nokuthi izwe lilengela kwinzikamnotho, yiko okwenza i-IMF ifune kunyuswe imalimboleko.
“Bekunethemba lokuthi umnotho uzokhula kodwa konke lokho kushabalele. Inkampani ekhiqiza ugesi, i-Eskom ayikho esimeni esihle ngenxa yezikweletu. Uhulumeni ufuna ukushintsha noMthethosisekelo ukuze aqale ukubuyisa umhlaba ngaphandle kwesinxephezelo,” kusho i-IMF esitatimendeni.
Ithe udaba lomhlaba kufanele lubukwe ngendlela ezoqinisekisa ukuthi ezolimo ziyathuthuka.
Iphinde yathi kufanele sifakelwe izibuko isiphakamiso se-ANC sokuthi iSARB kufanele yenganyelwe wuhulumeni ngoba lokhu kuphazamisa abatshalizimali.
Isazi sezomnotho, uSolwazi Bonke Dumisa, sithe kuyoba yishwa ukuthi iSARB inyuse imalimboleko ngoba isimo asisibi.
“Angihambisani nesiphakamiso se-IMF ngoba iSARB inohlelo lokugcina amandla emali (inflation targeting) ephakathi kuka3% no-6%. Njengamanje angaphezuku kancane nje kuka-5% okusho ukuthi izinto azikashintshi kakhulu. Bekungangcono ukuthi ngoLwesine iBhange loMbuso lingayishintshi imalimboleko liyishiye kuleli zinga ekulo njengamanje. Siyafisa nokuthi yehliswe ngo-25 basis points ngoba iRandi lihweba kahle uma liqhathaniswa nemali yakwamanye amazwe futhi no-oyela ongahluziwe wehlile,” kusho uDumisa.
Uthe kuzocaca ngoLwesine ukuthi iBhange loMbuso lenza njani kodwa yena akafuni inyuswe imalimboleko.
Uthe ukunyuswa kwemalimboleko kusho ukwanda komthwalo emahlombe abantu abanezikweletu ngoba kunyusa inzalo abayikhokhayo.
Ugqugquzele abantu ukuthi bakukhuthalele ukwazi ngezindaba zomnotho futhi baphawule ngazo ikakhulukazi uma kukhulunywa ngemalimboleko ngoba iyabathinta.