Ucekele phansi intombi nto eyidlwengula
USESIMENI esibucayi esibhedlela owesifazane oneminyaka engu23 ohamba uMkhosi woMhlanga odlwengulwe phambi kwezingane zakubo ekhonjwe ngesibhamu KwaBhayela, KwaNongoma.
Lesi sigameko esishiye umndeni walo wesifazane uthukile, senzeke ngoMsombuluko ekuseni.
Ngokuthola kweSolezwe bekuhambe ugesi ngesikhathi belala ngeSonto ebusuku.
Ngabo-2 ekuseni ngoMsombuluko ugesi wabuya sekukhona isigebengu endlini, siseduze kombhede walo wesifazane okade elele nodadewabo oneminyaka engu-12. Abanye ababili abangabafana bebelele phansi egumbini elifanayo, bona baneminyaka engu-12 no-13.
Izolo Isolezwe likhuluma nonina wale ntombazane uthe bathuka izanya emuva kwalesi sigameko.
“Indodakazi nezingane ezintathu bebelele endlini, kade kuhambe ugesi. Mina bengilele kwelinye ikhaya. Kuthe sekusile, sekubuye ugesi bavuka indoda isisendlini. Ishaye indodakazi ngesidunu sesibhamu, yayiphoqa ukuba ilale phansi. Umtshele ukuthi uzenza ngcono ngoba uyintombi nto ehamba uMhlanga, konke lokho ukuzitshela ngokuthi uyitshitshi kuzophela. Umdlwengule phambi kwezingane zakubo ezincane. Uthe azimboze ngengubo ngaphandle kwalokho uzozidubula. Siyasaba njengoba engakaboshwa umenzi wesigameko, asiphephile,” kusho unina wowesifazane odlwenguliwe.
Uthe indodakazi yakhe izamile ukulwa kodwa yashaywa kanzima ngesidunu sesibhamu ebusweni.
“Kumanje ulaliswe esibhedlela, ulimele futhi uhlukumezekile kakhulu nasemoyeni njengoba ebezigcinile, manje sekufika umuntu amhlukumeze ngale ndlela. Siyasola ukuthi lo muntu ubethunyiwe ukuba azodicilela phansi indodakazi yami ngokuziphatha kahle njengoba izinkulumo zakhe zikhomba ukuthi ubazi ukuthi iyintombi nto,” kusho unina wowesifazane odlwenguliwe.
Uthe bengumndeni bazizwa bengaphephile ngoba usabise ngokuthi uzobulawa uma indodakazi ike yabika ngalokhu.
“Okwenza singazi noma siphephile izinkulumo azishiyile lo mdlwenguli ukuthi uzodubula mina, uma indodakazi ibika ngokudlwengulwa kwayo. Asazi noma uzobuya yini ezohlasela njengoba ebehlome nangesibhamu nje,” kusho unina wowesifazane odlwenguliwe.
Lo mndeni uthe abungakakutholi ukulashwa ngokomqondo kulandela lesi sigameko.
Okhulumela amaphoyisa KwaZuluNatal uColonel Thembeka Mbele uthe amaphoyisa aKwaNongoma athungatha umdlwenguli.
“Ngokophenyo olusenziwe amaphoyisa, ngo-2 ekuseni ngoMsombuluko kudlwengulwe owesifazane oneminyaka engu-23. Umsolwa ube sethatha umsakazo nokudla wabaleka endaweni yesigameko. Amaphoyisa aKwaNongoma aphenya icala lokudlwengula nelokweba impahla endlini. Umsolwa akakaboshwa, kusaphenywa,” kusho uCol. Mbele.