ICosatu igxeka ukwenyuswa kwamaholo ezikhulu
UMFELANDAWONYE wezinyunyana zabasebenzi iCosatu KwaZulu-Natal, usugxeke isiphakamiso sokuthi uMengameli uMnuz Cyri Ramaphosa nePhini lakhe, amajaji, ongqongqoshe kanjalo noSomlomo wePhalamende, banyuselwe imali ngo-4% ekubeni kunesikhalo ngemali ekhokhelwa izisebenzi zikahulumeni.
UNobhala weCosatu eKZN, uMnuz Edwin Mkhize, uthe uyaxakeka ukuthi imali izonyuswa kanjani kangaka ngoba nezisebenzi zikahulumeni azisindile ezembeni lokudilizwa njengoba uNgqongqoshe weziMali uMnuz Tito Mboweni akhala ngokuthi sikhulu kakhulu isabelo esikhokhelwa laba basebenzi.
UMkhize uthe kuyadida ukuthi uhulumeni ukhala kanje kodwa izikhulu zibe zizonyuselwa ngale ndlela imali.
Ngokwesiphakamiso esilinde uMengameli ukuthi asigunyaze, uRamaphosa iholo lakhe lizonyuka cishe ngoR120 000 ngonyaka lisuke kuR3 million liye kuR3.1 million ngonyaka. Usomlomo, amajaji nosihlalo womkhandlu wezifundazwe nabo kuphakanyiswe ukuthi banyuselwe ngoR100 000, ongqongqoshe nondunankulu ngoR90 000.
“Uhulumeni uyasikhohlisa, kukhalwa ngemali ekhokhelwa abasebenzi bese izikhulu zinyuselwe ngemali engaka. Kanti ukunqanyulwa kwemali kwenziwa kubasebenzi kuphela yini noma kwenziwa kuwona wonke umuntu. Asihambisani nokuthi kwenyuswe imali yalezi zikhulu ngoba vele zihola kakhulu,” kusho uMkhize.
Uthe ngenxa yokwanda kwezehlakalo zokudilizwa kwabasebenzi emikhakheni ehlukene okubalwa nomasipala, bazomashela eHhovisi likaNdunankulu uMnuz Willies Mchunu, lapho bezohambisa uhlu lwezikhalazo ngendaba yokudilizwa.
Le mashi ezoba kusasa eMgungundlovu izoholwa nguMengameli weCosatu, uNksz Zingiswa Losi.
UMkhize uthe bonke abasebenzi abazoba yingxenye yale mashi bazobe bevikelekile ngoba bafake isicelo sokuthi abasebenzi babe yingxenye yale mashi.
“Omasipala sebeyadiliza. Sibambe uMasipala waseLangalibalele (okwahlanganiswa uMasipala waseMbabazane noMtshezi) abafuna ukudiliza abasebenzi bengayilandelanga imigomo.
“Inkinga ngukuthi awekho amakhono okuphatha yingakho bemane bacabanga ukudiliza. Sikulwile lokhu neSamwu ukuze kulandelwe uhlelo lwezomthetho.”
UMkhize uthe uma ngase izinkampani ezingaphansi kukahulumeni zingadayiswa, abasebenzi bazolahlekelwa wumsebenzi wathi yingakho bengahambisani nokwashiwo nguMboweni mayelana neSouth African Airways.
Lo mfelandawonye ugxeke nezinkinga ezibhekene nabasebenzi eMnyangweni wezeMpilo esifundazweni.
USihlalo weCosatu eKZN, uMnuz Skhumbuzo Mdlalose, ugxeke lo Mnyango ngokuthi abasebenzi basebenza ngaphandle kwezinto ezizobavikela, ikakhulu labo abasebenza emakhazeni.
Uthe kumele kuxazululwe izinkinga wathi izinyunyana ezingaphansi kweCosatu iNehawu, Denosa nePawusa sezikhalile ngezinkinga ezikhona eMnyangweni.
“Ungqongqoshe kumele axazulule izinkinga ezikhona kulo Mnyango. Siwufunile umhlangano naye kodwa kunokubambezeleka okukhona. Akuxazululwe izinkinga ezikhona angajahi ukuyohlinza isiguli esisodwa engabe ulungisa izinkinga ezibhekene nabasemakhazeni,” kusho uMdlalose.
Uthe lezi zinyunyana ezintathu kukhona ezikuhlelayo okuzobhekiswa eMnyangweni wezeMpilo.