Siqhubeka namuhla isicelo sebheyili ‘sabaqotha’ umndeni
KULINDELEKE ukuthi silalelwe namuhla isicelo sebheyili esizofakwa ngabalisa ababili abasolwa ngokubulala amalungu ayisikhombisa omndeni waseVlakfontein, okukhona kubona abagqitshwa endlini.
Izolo kuphazamisekile ukulalelwa kwesicelo sebheyili sikaMnuz Fita Kuphe (61) noMnuz Ernest Mabaso (27) ngenxa yokuphela kukagesi, eNkantolo yeMantshi eLenasia.
Ekhasini loMnyango wezokuPhepha eGauteng kuTwitter, uNkk Sizakele Nkosi-Malobane, onguNgqongqoshe walo Mnyango, uthe lihlelisiwe 3.
Icala labalisa ababili abasolwa ngokubulawa kwabantu abaningi (amalungu ayisikhombisa omndeni owodwa) lihlehliselwe uLwesithathu (namuhla) ngenxa yokuphela kukagesi.
UNkk Nkosi-Malobane nobuholi baseVlakfontein baye enkantolo behambisa incwadi enxusa inkantolo yaseLenasia ukuthi ingabadedeli abasolwa.
Laba bobabili babhekene namacala okubulala amalungu omndeni wakwaKhoza ayisikhombisa, uNksz Mbali Khoza (51), nodadewabo uNksz Dudu Khoza (46) indodakazi yakhe uNksz Nomfundo Khoza (28) nabazukulu uKarabo (11), Luyanda (7), Nkanyiso (2) noSibongakonke (2). UMabaso uphinde abhekane namacala amathathu okudlwengula. Izidumbu zabo zitholakale ngo-Okthoba 29 ezinye zazo zigqitshwe endlini emuva kokuthi begcine ukubonakala ngo-Okthoba 19. UMabaso kuthiwa wafika kulo mndeni ezenza isihlobo sabo ezibiza ngoSibusiso Khoza. UKhuphe kuthiwa wayethandana noMbali ongomunye wababulewe.
UMabaso okuvele ukuthi ungowaseZimbabwe wayeqale wathi ngeke asifake isicelo sebheyili.
Ngesikhathi begcina ukuvela enkantolo ngoMsombuluko odlule, uMabaso ucele ukuthi bangagcinwa ejele elilodwa ngoba ethi uKhuphe ongowaseMozambique, uyamsabisa. Bevela enkantolo laba bobabili, bebehlala baqhelelane kube sengathi abazani. Uma bevela enkantolo kuyagcwala kube nombhikisho ngaphandle kwenkantolo.