Abakuleli ababonele kwabafunde eCuba bahambele iziguli
SESIYAVUNA impela isizwe ngembewu esiyitshalelwe nguMnyango wezeMpilo ngokuthumela intsha yakuleli ukuyofundela ubudokotela ezweni iCuba.
Isenzo sakamuva selinye iqembu lodokotela eliqeqeshelwe ukwenza lo msebenzi eCuba, sikuvezile ukuthi kungani lolu hlelo lubalulekile.
Labo dokotela bahambele izindawo ezehlukene ezisemakhaya KwaZulu-Natal zingena umuzi nomuzi zihlola abantu abagulela emakhaya.
Uhlelo lokufundela ubudokotela eCuba lugquguzela ukuthi odokotela bahambele iziguli emakhaya futhi bazane babe nobudlelwane neziguli.
Kule nkinga izibhedlela zikahulumeni ezibhekene nayo yomthamo ophezulu weziguli, kumele kushayelwe ihlombe okwenziwe yilabo dokotela ngoba kabalekeleli ekwehliseni lo mthamo kuphela kepha basiza nalabo osekunzima ngisho nokuya esibhedlela.
Maphakathi nonyaka kuke kwaba nemibiko iqembu eliphikisayo likhala ngokuthi lolu hlelo olwaqala ngo-1996, ludla uhulumeni izigidigidi zemali ngakho kumele lumiswe ebese kuthuthukiswa izikhungo zakuleli eziqeqesha odokotela.
Lesi sikhalo sasibhebhezelwa nayimibiko yokuthi abathunyelwe ukuyofundela ubudokotela eCuba bafika khona bagxile kwezinye izinto.
Kwakubikwa ukuthi abanye bagxile otshwaleni kanti abanye bagxila ekushumayezeni abantu emigwaqweni yaseCuba, bakhohlwe abakuzele.
Odokotela abahambele KwaXimba ngeledlule behlola iziguli imizi ngemizi basivezele esinye isithombe ngohlelo lwaseCuba.
Kungenzeka ukuthi inkulu imali ekhishwa nguhulumeni ukuyofundela ubudokotela eCuba kepha imiphumela yalolu hlelo siyayibona.
Lokhu kusho ukuthi izikhungo eziqeqesha odokotela zakuleli kumele nazo ziqinise ohlelweni lokusebenzela umphakathi njengoba kwenza uhlelo lwaseCuba.
Laba asebeqalile ukuhambela iziguli emizini nasemakhaya azo, sengathi bangaqhubeka nalo msebenzi omuhle babe yisibonelo esihle nakwabanye odokotela.