Imifelandawonye ineqhaza ekukhuliseni amabhizinisi
SIKHULA NGOMNOTHO
IMIFELANDAWONYE ineqhaza elibalulekile emnothweni njengoba ihlanganisa amabhizinisi amancane ukuze akwazi ukuqhudelana namabhizinisi amakhulu.
Inhlosongqangi yemifelandawonye ngukubambisana ukuze kukhule amabhizinisi amalungu. Lokhu kubambisana kuhlanganisa umfelandawonye wokuthenga ukucobelelana ngolwazi, ukwabelana ngezinto zokusebenza, ukukhuthazana nokunye.
Amabhizinisi aphinde ahlomule ngokuhwebelana okwenza imali ijikeleze emphakathini owodwa kunokuthi iphumele ngaphandle. Lokhu akulula ukufinyelela kukho kosomabhizinisi abancane uma besebenza ngabodwana.
Ukuphumelela kwemifelandawonye emazweni ahlukene kwagqugquzela uhulumeni waseNingizimu Afrika ukuthi abe nohlelo lokuthuthukisa imifelandawonye.
Yize yayivele ikhona phambilini kodwa iningi layo lalihlanganisa amabhizinisi abamhlophe kuphela.
Umbiko ukhombisa ukuthi umkhankaso kahulumeni wokuthuthukisa nokuxhasa imifelandawonye unezithelo ezinhle njengoba ikhule isuka ku-1 500 ngo-1995 yayofika ngaphezu kuka-20 000 ngo-2015.
Iningi lemifelandawonye yasungulwa KwaZulu-Natal kanti lokhu kuwumphumela woxhaso nezinsiza zikahulumeni wesifundazwe ezisezingeni eliphezulu.
Okunye okuvelayo wukuthi imifelandawonye eminingi igxile kwezolimo. Inkinga wukuthi njengoba iminingi esungulwayo, miningi futhi neshabalalayo kanti eminye ayisebenzi ngendlela.
Ziningi izingqinamba ehlangana nazo kodwa kungasinika isithombe esisobala ukubhekisisa ukufinyelela komkhiqizo ezimakethe.
Kufanele ube nolwazi lwemakethe nemigudu yokufinyelela kumakhasimende amaningi.
Ngaphezulu kwalokhu kumele ukhiqize ngezindleko eziphansi ukuze ukwazi ukuncintisana nabanye abakhiqizi abakhulu ngentengo.
Okokugcina wukuthi uma ufakela izitolo ezinkulu kufanele unike isiqiniseko sokuthi bazowuthola umkhiqizo uma bewufuna.
Konke lokhu kudinga uhlelo oluphusile ukuze izitolo ofuna ukuziphakela zikholwe ukuthi ungazifakela umkhiqizo ngokuqhubekayo.
Ake senze isibonelo; umfelandawonye okhulisa izinkukhu uthola ithuba lokuphakela indawo yokudlela enochungechunge lwezitolo. Ake sithi bathengisa izinkukhu eziwu-250 000 ngesonto bese benika umfelandawonye umthwalo wokubaphakela izinkukhu eziwu-25 000 njalo ngesonto unyaka wonke. Lo mfelandawonye kufanele uqiniseke ukuthi uzomelana nalesi sivumelwano ngokwamanani, ikhwalithi nentengo.
Kulindeleke ukuthi izinkukhu zikhiqizwe amalungu ahlukene bese behlanganisa umkhiqizo uma sebediliva. Kufanele kube nesiqiniseko sekhwalithi efanayo nokuthi ilungu ngalinye liyakwazi ukuletha inani elinqunyelwe lona. Akuwona umsebenzi olula lo ngoba amalungu omfelandawonye aziphethe wona.
Kumele acabange ngokuthi azokuvimba kanjani ukungadilivi kwamanye amalungu kanti kusho ukuthini lokho enkontilekeni abayisayinile.
Lokhu kufanele kucace ngokusobala ngesikhathi umfelandawonye usafuna le nkontileka.
Akuphelele lapho, noma isitholakele inkontileka umfelandawonye kufanele ujule ngokuthi kungasho ukuthini ukuwa kwenkampani abayiphakelayo.
Kuvame ukuthi abakhiqizi baphakele izinkampani ezihlukene ukuze bangabi sengcupheni uma enye iwa. Konke lokhu kwenzeka nje ziningi ezinye izingqinamba okufanele amalungu abhekane nazo.
Mhlawumbe akufanele imifelandawonye ibhekane nakho konke lokhu. Kungasiza ukuthi kube nenkampani noma inhlangano ebhekene nokufika komkhiqizo ezimakethe ukuze imifelandawonye igxile ekukhiqizeni ikhwalithi.
Le nhlangano kungamele isize imifelandawonye ikhiqize ikhwalithi edingwa imakethe, ithole amathuba ezimakethe phakathi ezweni nakwamanye amazwe iphinde iqinisekise ukuthi amalungu ayakwazi ukumelana nenkontileka.
Kuningi futhi angakufunda kweminye imifelandawonye ekwezinye izindawo eyingxenye yenhlangano. Okusemqoka wukuthi ngesikhathi kuvuleka izimakethe ezihlukene, namathuba okusimama ayakhula.
Asikho isidingo sokuthi izenzele konke lokhu ngokwayo kodwa kufanele ithole labo abamkhantsh’ubomvu ekusebenzisaneni nezimakethe.
Ngale ndlela uyakwazi ukugxila kulokhu okwazi ukukwenza kangcono. Asihlanganeni siye phambili.
Sishayele noma uthumele umyalezo ku-060 586 9798 noma ku-083 354 8794. Bhalisa uthole ulwazi olunohlonze ku www.ubuntuwealth.co.za. Hheshe!