Asiphumeni siyovota sizikhulule
MHLELI: Kungabe umphakathi uyahluleka yini ukucabanga? Kungabe umphakathi awukwazi ukuhlukanisa okuhle nokubi? Kungabe abantu baseNingizimu Afrika babukeka bengamathuluzi yini ?
Yisikhathi esinzima lesi kosopolitiki kodwa esihle emalungwini omphakathi. Kungabe abavoti bayakuqonda yini ukubaluleka kokuvota?
Into edala ngizibuze lo mbuzo yingoba ngibona bengakuqondi ukubaluleka kokuvota. Ave ihlekisa ke eyosopolitiki ngoba uma sikhala ngabaholi abasifunza bona bathumela amaphoyisa ukuba azosidubula sishawe siboshwe kodwa manje ngoba sebefuna sibavotele sebegcwele imigwaqo, bangena yonke indawo balanda nosondonzima babo ukuba bazosinxenxa ukuba sibavotele. Uma sesibavotelile bazophinda ePhalamende. Manje bazosithembisa izulu nomhlaba kodwa izolo lokhu ngo-2016 besikhala ngokufunzwa amakhansela abakaze behle bazosilalela kodwa manje sesiphambana nabo eminyango yemizi yethu nala makhansela abasipha wona angazi lutho. Kungabe abaholi sebekhohliwe yini into abasenza yona ngo 2016? Niyakhumbula bahlonishwa sikhala nisibiza ngamaqeqebane adiniwe? Manje izilonda enasishiya nazo nicabanga ukuba sezipholile yini? Anikaze nibuye nizozehlisa nixolise seniqhamuka nolunye uhlelo. Futhi nango 2021 nizophinde nibonakale senenza nje.
Kuzonisiza ngani ukuhamba nala makhansela angafunwa nizosinxenxa ukuba sivote. Uma ningenalo uvalo yini nisondele kithina manje? Baholi sesiyayazi imikhuba yenu nokuthi niyigila kanjani. Sesiyazi ukuthi umuntu ofunwa abantu animfuni nifuna owenu ozokwenza intando yenu hhayi eyomphakathi. Siyazi ukuthi nithi kukhona okumele bancishwe ubulungu ukuze nizoqhubeka kahle nemikhuba yenu yokusidonsa ngamakhala.
Umphakathi awuvuke emaqandeni awuhambe uyobhalisela ukuvota ukuze uma sekufike usuku lokuvota uhambe uyovota ngendlela ofisa ngayo ngoba ukuhlala ekhaya nokuduba ukuvota ngeke kusisize.
Asiphumeni siyozikhulula ngoba uma singakwenzanga lokho siyokhala iminyaka njengenjwayelo. Umuntu uyena ozaziyo ukuthi ufunani. Ukungavoti akusiso isisombululo. Angisho ukuthi niyovotela liphi iqembu kodwa kuhle ukuthi ukuvota kwakho kungakucindezelisi, kumele kuwenze umehluko empilweni yakho ngoba niyabona amaqili namanqe agcwele imigwaqo bafuna ukusisebenzisa ukuze kuzophusheka izinhloso zabo.
Sesiyazi ngamaphasela okudla kwenyanga eyodwa okusinxenxa ukuba siyovota, siyazi ngezidingo esizolethelwa zona izinyanga ezimbili emva kwalokho kuyobe sekuphelile.
Sekuqhamuka nezimoto ezinhle manje bazoxova nathi udaka. Ezitimeleni bayeza, emarenki, ezinkundleni zokuxhumana bayeza. Zethu Phewa ETHEKWINI