Ubaleke wayobhaca osongelwa ocingweni
USEBALEKE waya ekubhaceni ngenxa yokuthola izinsongo ocingweni ezimsabisayo unina wesikhulu sikaMasipala waKwaNongoma ebesisophikweni lwamathenda esibulawe ePort Elizabeth.
UNkk Nompumelelo MaZulu Shoyisa ubaleke ngemuva kokuthola izingcingo ezimphoqa ukuba ayeke ukuhambe ebalisa ngokuthi indodana yakhe, uMnuz Bonginkosi Shoyisa, ibulewe.
Lokhu kuvezwe wumfowabo kamufi, uMnuz Simon Shoyisa, othe unina ushiyile ekhaya ngoba kukhona abamshayela ucingo bemsabisa njengoba bekwenzeka kumufi obezofakaza ecaleni ebelingena izolo enkantolo yaseMthunzini.
Icala lisuswe kwaNongoma ngenxa yezokuphepha layiswa eMthunzini.
Umufi ushone esohlelweni lokuvikelwa kofakazi boMbuso. Ubegcinwe eWalmer, ePort Elizabeth, ukuze aphephe.
Nokho umndeni ubikelwe sekuphele isonto kade ungamtholi ezingcingweni ukuthi ushone ngokugula nokuyinto eshayisanayo nombiko kaDkt Gregory Hanslo, ohlole isidumbu, okhomba ukuthi wabulawa wakhishwa namehlo.
Umndeni waziswa ukuthi uyabhala ngaphambi kokubikelwa ukuthi useshonile ngenyanga eyedlule.
“Sesifisa kungenelele uMnuz Bheki Cele kule nto ngoba sekuyacaca ukuthi sizobulawa sonke ekhaya njengoba nomama esatshiswe waze wayobhaca. Asisawathembi amaphoyisa ngenxa yento eyenzeke kumfowethu. Lezi zingcingo ezingena kumama zimtshela ukuthi akashintshe isitatimende sakhe sokuthi uBonginkosi ubulewe kodwa kumele athi wagula njengoba kusho amaphoyisa. Kodwa siyaxakeka ukuthi angakusho kanjani lokho ekubeni umbiko kadokotela usubonwe yizwe lonke futhi uyasho ukuthi wabulawa,” kubalisa uShoyisa.
Uthe nomfowabo ubebabikela ukuthi ungenelwa yizingcingo ezimsabisayo.
Umufi ubengufakazi oqanda ikhanda ecaleni lokufa ngokudutshulwa kukaMnuz Archie Duma owayenguMcwaningimabhuku kuMasipala waKwaNongoma ngo-2016 nowayezodedela umbiko owawuveza amahlazo okwebiwa kwezigidi zamaRandi zentuthuko yomphakathi.
Ecaleni lokufa kwakhe kuboshwe uMnuz Phakamani Innocent Mthembu owayeyisikhulu sezimali KwaNongoma.
Icala bekumele liqale ukuqulwa ngoMsombuluko kodwa ummangalelwa ushintshe ummeli. Usuku lokuqulwa kwecala luzokhishwa ngoDisemba 12.
Okhulumela amaphoyisa eNingizimu Afrika, uColonel Brenda Moridili, uthe basalinde izimpendulo ohlakeni oluqondene nodaba ngokufa kukaShoyisa.