UGrant ujabulile ngababuya kumaProteas
UHLEKA yedwa umqeqeshi weDurban Heat, uGrant Morgan, kulandela ukufika kwabadlali abahlonishwayo kwezakhe abebeyingxenye yeqembu lesizwe amaProteas.
IHeat ayiwuqalanga kahle umqhudelwano we-T20, iMzansi Super League (MSL). Ishaywe iCape Town Blitz ngamawikhethi amathathu ngeledlule.
Namhlanje ezikaMorgan zizotholana phezulu neTshwane Spartans, eKingsmead Stadium ngo-2 ntambama.
UMorgan utshele izintatheli izolo ukuthi kuyamthokozisa ukuthi uDavid Miller, Heinrich Klaasen noBrandon Mavuta bazoba yingxenye yeqembu elizodudulana neTshwane Spartans.
Laba badlali bebehambele e-Australia njengoba amaProteas kade evakashele khona.
“Ngijabule ngokuthi kubuya abadlali abanohlonze futhi abanesipiliyoni sokudlala esigabeni esiphezulu. Angingabazi ukuthi bazonezezela kulokhu vele esesikuqalile. Akusavumi ngilinde umdlalo wethu neSpartans,” usho kanje uMorgan izolo. Ngokusho kukaMorgan, nakuba beshayiwe ngeledlule kodwa kuningi okuhle abakuzuzile ikakhulukazi ngaphandle kwenkundla. Uthe abadlali bakhe sebesondelene kakhulu ngokomoya, nathe izitha kuyofanele zibhukule ukusuka manje ngoba ezakhe ziza ngamandla.
Ukaputeni weHeat u-Albie Morkel, uveze ukuthi uliqonda kangcono iqembu iSpartans, kwazise kunomhlobo wakhe wakudala abadlale naye iminyaka u-AB De Villiers.
UDe Villiers akadinge kuchazwa kwikhilikithi, ikakhulukazi kulolu hlobo lomdlalo (T20), njengoba esezakhele ugazi kubalandeli balo mdlalo ngokulahla ibhola ezihlweleni.
“Ungumdlali onohlonze futhi wonke umuntu akujabulelayo ukudlala naye. Ukukhombisile lokho emiqhudelwaneni eminingi eseyidlalile emhlabeni jikelele. Sineqhinga esizozama ngalo ukuvimba uDe Villiers ukuthi angenzi adume ngazo. Abanye babadlali kwiSpartans ngidlale nabo kakhulu kwelesizwe, ngakho ngisazoke ngibathinte ngocingo ngizwe ukuthi imaphi amaqhinga abanawo,” kuncokola uMorkel.