Usephila ngethemba uKeagan Dolly
KUNGASE kuphele unyaka esebuyele ngokugcwele enkundleni umdlali weBafana Bafana, uKeagan Dolly, olimale kabi ngoSepthemba edlalela iqembu lakhe laseFrance, iMontpellier.
UDolly ozakhele udumo kwiMamelodi Sundowns ngaphambi komdonsiswano ngaye, ufike eFrance wathwala kanzima ngokwesikimu. Kuthe lapho eseqala khona ukusenza esakhe isikimu wase elimala ngomzuzu wesine emdlalweni wesithathu weligi.
Kusukela elimalile uDolly useqiwe izinyanga ezimbili elibuka ekhaya kumbe esezihlweleni ibhola uma kudlala iMontpellier kanti kwiBafana useqiwe imidlalo emithathu leli qembu lesizwe eliyidlale namazwe ahlanganisa iNigeria neSeychelles.
Ngokusho kukaDolly kwi-website yeMontpellier, sekusele amasonto ambalwa ngaphambi kokuthi aqale ukuziqeqesha ngokuthi athinte ibhola. Kusukela ehlinziwe uDolly usehlale amasonto ayisishiyagalombili eziqeqesha yedwa.
“Ngihlalele ethembeni ukuthi okungenani emasontweni amabili ngibe sengilithinta ibhola. Kunzima ukuhlala ungadlali yize sonke sazi ukuthi kuyingxenye yalo mdlalo wethu. Ngijabule nokho ngoba akubona odokotela abangitshela ukuthi sekuseduze ngibuyele enkundleni, ngizizwa mina. Sengikulungele manje ukujoyina ozakwethu,” kusho lo mdlali oke wadlala nakwiAjax Cape Town.
Nakuba kungazange kumphathe kahle ukuthi alimale ngalesi sikhathi eseqala ukuyenza eyakhe indawo, kuleli qembu laseFrance, kodwa uDolly uzimisele ukusebenza nakakhulu ngisho ngabe kuthiwa akaqale phansi.
“Ngeke ngiqambe amanga kungiphoxile ukulimala ngalesi sikhathi nami sengizizwa ngiyingxenye yeqembu. Akuphelanga ngisho imizuzu emihlanu ngabe sengilimele into ebizongihlalisa isikhathi eside. Kuzomele ngiqine ukhakhayi ngoba ngiyazi ukuthi lezi zinto ziyenzeka ebholeni. Lokhu akusho ukuthi akukho buhlungu ukuhlala ungadlali ngoba ulimele. Kukhona nokho okuhle engikuzuzile ngalokhu kulimala ngoba ngithole nethuba lokuzikhulisa nakokunye obekungihlupha. Ejimini ngithole isikhathi esanele sokwakha umzimba wami okuyinto ezongisiza uma sengibuyile ngokugcwele enkundleni. Kuhle futhi ukuthi iqembu belenza kahle njengoba ngilimele ngakho-ke uma sengibuyile ngimelwe ukuqhubeka lapho kugcine khona abebedlala ngilimele,” kusho lo mdlali.
Mayelana neBafana, uDolly uthe, “Ngikubheke ngabomvu ukubuyela kwiBafana. Umdlalo weLibya ngiwubhekile ukuze ngiqinisekise ukuthi ngiba nesandla ekufakeni iNingizimu Afrika kweyamanqamu ye-Afcon, eCameroon.”