KUSACWEBE IZIZIBA NGOMSEBENZI KWABEBEDUME KWI-PSL
NJENGOBA sezibheke ekhefini likaKhisimusi bonke abasondelene nePremier Soccer League (PSL) bayazi ukuthi lesi yisona isikhathi okucaca ngaso abazodliwa yizembe nabazoba sembangwnei wesicoco. Okungajwayelekile kulesi sikhahti ukuthi kube nabadlali abanamagama kodwa ababhuquza ekhaya ngoba bengenawo umsebenzi.
Kuyalimangaza iqhawe lakho uPotshoza ukuthi kuzodingeka ukuthi kuze kube uJanuwari lapho kuzovuleka khona iwindi lokushintshana ngabadlali bese kuba yima bethola amaqembu oTsepo Masilela, Tefu Mashamaite, Tsepo Gumede nabanye abadlali abazakhele igama eminyakeni edlule.
UMasilela odlale eSpain nakwa-Israel namanje akaklitholi iqembu kusukela ingavuselelwanga inkontileka yakhe kwiKaizer Chiefs kuqala isizini. Namanje lo mdlali ongumfowabo ka-Innocent Maela we-Orlando Pirates usathungatha iqembu namanje.
Yisimo esifanayo nakuTravis Graham ogcine ukubonakala kwi-Ajax Cape Town engukaputeni. Inkontileka yakhe ne-Ajax iphele ngoJuni 30. Kwenzeka konke lokhu nje, ubevele edlaliswa kwiMultichoice Diski Challenge nangesizini edlule.
Omunye umdlali obhekene nale ngwadla uMandla Masango ogcine ukubonakala kwiRanders FC yaseDenmark okuyisifo esifanayo nakuGumede obedlala kwiPirates phambili kodwa wagcina ukubonakala kwiCape Town City. UMashamaite odle izicoco neChiefs uchithwe yiSuperSport ngoJuni 30 naye namanje usaphanda lapho angathola khona umsebenzi.
Iqhawe lakho selingamfaka noMzikayise Mashaba obekwiMamelodi Sundowns. Indlela yokuziphatha iyamshaya nokho uMzi yingakho nakwiChiefs kugcine kungazange kuphumelele kwazise bebemhlola ngenhloso yokumsayinisa ekuqaleni kwesizini.