Bakhathazekile ngesiteleka sabamakhaza
IZINHLANGANO zezepolitiki sezizwakalise ukukhathazeka ngesimo esesikhona emakhazeni kahulumeni ahlukene KwaZulu-Natal emuva kokuthi abasebenzi bengenele umbhidlango wokuhudula izinyawo.
Leli phephandaba libike ngokuduva kwezidumbu emakhazeni ahlukene emuva kokuthi abasebenzi bamakhaza kahulumeni okubalwa kubo ePinetown, Park Rynie, Port Shepstone nakuGale Street bejoyine abasebenzi baseFort Napier abaqale ukuhudula izinyawo ngesonto eledlule ngoba bekhala ngezimo zokusebenza. Laba basebenzi baphinde bakhala ngokungafezwa kwesivumelwano esasenziwe nguMnyango wezeMpilo sokubakhokhela ngokwemisebenzi abayenzayo.
Ilungu lesiShayamthetho le-IFP, uNkk Ncamisile Nkwanyana, lithe kufanele uNgqongqoshe wezeMpilo eKZN, uDkt Sibongiseni Dhlomo, alethe uhlelo oluphelele olukhombisa ukuthi bazosivimbela kanjani isiteleka esiqhubekayo sabasebenzi basemakhazeni esesiphazamise imindeni efuna ukungcwaba.
Uthe baphoxekile ngendlela okusingethwe ngayo izindaba zabasebenzi basemakhazeni. UNkk Nkwanyana uthe ingqinamba ebhekene nelakuleli ukuthi uhulumeni nabantu abavoteliwe benzele phansi umphakathi ngokuthula kwabo.
“Abasebenzi basemakhazeni sebezitshele kaningi iziphathimandla ngezinkinga ababhekene nazo kodwa azikho izinyathelo esezithathiwe ukuzixazulula. Ngenxa yalokhu kunganaki kwalabo abasezikhundleni eziphezulu imindeni yabashonile seyithwele kanzima,” kusho uNkk Nkwanyana.
Uthe banxusa bonke labo abathintekayo kule nkinga ukuthi baxoxisane ngokushesha bese befinyelela esivumelwaneni.
Oyilungu le-DA esiShayamthetho, uDkt Imran Keeka, usole uDhlomo ngokuhudula kwezinyawo kwabasebenzi.
“Sekuphele isikhathi eside engenzi lutho ukuxazulula izinkinga ezahlukene eziphakamiswe abasebenzi ngisho ukuhlukumezeka kwabasebenzi nosekuholele esitelekeni. Avame ukukwenza ukuzenza umsindisi neqhawe ngokuthi afingqe imikhono yakhe bese ezihlinza yena izidumbu,” kusho uKeeka.
Uthe inhloko yoMnyango wezeMpilo uDkt Musa Gumede yatshela ikomiti lezempilo ukuthi zizoxazululwa izinkinga zabasebenzi basemakhazeni kodwa kuze kube manje akukho okwenziwayo.
Uthe imindeni eshonelwe igcina seyikhokha imali engaphezulu kwalena okufanele iyikhokhe ngoba ilokhu ihlehlisa imingcwabo.