Kutholwe izidumbu esezonakele
USAKHUNGATHEKILE umphakathi waKwaNodwengu, eBhamshela, ngemuva kokutholakala kwezidumbu ezimbili zabesilisa sezonakele ehlathini izolo ekuseni.
Lezi zidumbu okusolakala ukuthi ngezikaMnuz Mboniseni “Boni” Mgeyane noMnuz Senzo “Zehla” Mkhize zitholakale ngemuva kokuboshwa kwabasolwa ababili, abavele bahamba bayozikhomba beqhutshwa ngamaphoyisa.
Laba basolwa kuthiwa babanjiswe ukuthi omunye wabo utholakale nesibhamu esingekho emthethweni.
Lezi zidumbu bezifihlwe ezindaweni ezihlukene kodwa ehlathini elilodwa njengoba esinye sitholakale phakathi ehlathini ngasesihosheni kwathi esinye satholakala bude buduze nendlela.
Esinye salezi zidumbu kuthiwa kusona bese kusele isinqa kuphela. Abafi okuthiwa bebengabangani baduka ngoJulayi. Abafi kuthiwa akubona abaKwaNodwengu kodwa abaseNgcongangconga.
Ngesikhathi kufika ithimba leSolezwe kule ndawo izidumbu besezithathiwe ngamaphoyisa kodwa abantu bebesami izixongololo emgwaqweni bebhunga ngale ndaba.
Ezinye izinsizwa zilanyelwe yileli phephandaba zisemi emgwaqweni oseduze nehlathi lapho kutholakele khona izidumbu.
Owesilisa okhulume neSolezwe kodwa wacela ukuthi angadalulwa uthe basashaqekile ngalesi sigameko.
“Sithukile ngale nto ngoba izwe lethu leli okutholakele kulo izidumbu, manje sekungathi ithina esigangayo kanti abantu bakwezinye izindawo abagila imikhuba bese bezolahla abantu lapha,” kusho lona wesilisa.
Uthe kade bezwa ngokulahleka kwalaba bantu njengoba izidumbu zabo zize zatholwa izolo.
“Kuthiwa into eyejwayelekile ukuthi kulahleke abantu eNgcongangconga, izidumbu zabo zitholakale zicwiyiwe,” kuqhuba lona wesilisa. Elinye ilungu lo mphakathi waseNembeni nalo elicele ukuthi lingadalulwa lithe basola ukuthi zikhona ezinye izidumbu ezisazotholakala kuleli hlathi. “Ziningi izidumbu ezisazophuma njengoba amaphoyisa ethi kukhona ezingakatholakali, sizwe amaphoyisa ethi amaselula abagilwa akhomba ukuthi aseJozini,” kusho leli lungu lo mphakathi. Okhulumela amaphoyisa KwaZulu-Natal, uColonel Thembeka Mbele, uthe amaphoyisa aseNzuze nethimba lesifunda iLembe bebelandela umkhondo izolo noholele ekutheni kutholakale izidumbu ezimbili zabesilisa abebengabangani KwaNodwengu.
“Kuvulwe amacala amabili okubulala esiteshini samaphoyisa eNdwedwe kwaboshwa abasolwa ababili iminyaka yabo ephakathi kuka-29 no-31.
“Lo msolwa oneminyaka engu31 utholwe nesibhamu inombolo yaso ebixikiziwe, ube eseboshwa wavela eNkantolo yeMantshi yaseNsuze namhlanje (izolo),” kusho uColonel Mbele.
Uthe lo msolwa uzobuyela enkantolo ngoNovemva 28 esevela nomsolwa wesibili obekwe icala lokubulala.