UMbalula ubona ubunzima okhethweni
INHLOKO yezokhetho kwiANC, uMnuz Fikile Mbalula, ithi luzoba nzima ukhetho lwangonyaka ozayo futhi ngeke bawine ngomlingo.
UMbalula uthe kumele basebenze kanzima ukuze bawine ngamalengiso.
“Sisebenzisa wonke umuntu, owayengumholi kubalwa nababengomengameli uZuma (Jacob) noMbeki (Thabo) ukuthi babe yingxenye yemikhankaso. Wonke umuntu umenyiwe ukuthi abe yingxenye yomkhankaso,” kusho uMbalula.
Ukusho lokhu izolo ekhuluma nezintatheli ngamalungiselelo omgubho weminyaka engu-107 eyaziwa ngeJanuary 8 statement ezoba senkundleni yemidlalo iMoses Mabhida eThekwini ngonyaka ozayo.
Uthe abantu basayethemba inhlangano njengoba ihola umphakathi wathi ukwesekwa abakubukeli phansi.
“Ukuhola izwe akulula ngoba wonke umuntu ugxeka iqembu elibusayo, yingakho imanifesto yethu igxile kubantu,” kusho uMbalula.
Uthe uMengameli we-ANC nezwe uMnuz Cyril Ramaphosa uhola umkhankaso we-ANC.
Uthe bakulindele ukudla umhlanganiso okhethweni lwangonyaka ozayo.
Odabeni lokuxhaswa komkhankaso kaRamaphosa ngo-R500 000 yiBosasa, ohola imikhankaso ye-ANC uMnuz Senzo Mchunu, uthe uMengameli uyichaze yacaca le ndaba.
“Siyaseseka isitatimende sikaMengameli odabeni lweBosasa. Siyazi ngeke kuphele iminyaka kuxoxwa le ndaba ngoba uma umengameli elungisa into uyashesha.”
UMbalula uthe uRamaphosa akazange acashe ngesithupha uphendulile ngemuva kokuphenya ukuthi imali yeBosasa kwakungeyani.
“Baningi abantu ababesemkhankasweni wokuhola inhlangano sibheke eNasrec nyakenye. Nami umuntu engangimeseka angazi malini umkhankaso wakhe nokuthi waxhaswa ngobani, baningi abaholi ababesembangweni, uDkt Zweli Mkhize, Nksz Lindiwe Sisulu, Dkt Nkosazana Dlamini Zuma, engangimeseka kodwa owayengeke alibone elidlalayo kunina bezindaba ngoba nanisho yonke into ngaye. Nanithi wayeshade noZuma nisho yonke into. Imikhankaso yayimnandi kodwa ngemuva kwaseNasrec kwadlula konke,” kusho uMbalula.
Mayelana nalabo abayisa inhlangano ezinkantolo, uthe ngeke babaxoshe bayabamukela.
“Asibaxoshi noma bangasiyisa kangaki ezinkantolo. Lonke ilungu libalulekile noma kungathiwa lilodwa,” kusho uMbalula.
Uthe bafuna ukugcwalisa iMabhida ehlala abantu abangu-74 000, wathi bafuna ukugcwalisa nengapandle lakhona okungahlala abantu abangu-74 000.
“Ngelanga lokuthulwa kwemanifesto silindele abantu abangu-140 000 eMabhida nangaphandle kwayo. Yonke into isimi ngomumo ngalo mgubho ozoba ngoJanuwari 12, 2019,” kusho uMbalula.