Uzinikele emaphoyiseni ‘onqume’ ingane
UZINIKELE emaphoyiseni umlisa (28) waseMgungundlovu osolwa ngokuthumba ingane ayinqume ikhanda emuva kokutshela unina ukuthi uyithumbe ngoba ejezisa yena ngokugxambukela ezindabeni zakhe nobeyintombi yakhe.
Kuthiwa lo mlisa waseSwapo, eMgungundlovu , uzinikele emaphoyiseni ngoLwesibili ntambama emuva kokuthi enyamalale no-Andile Malwande Fihla (11) ngoLwesihlanu oludlule.
Okhulumela amaphoyisa KwaZulu-Natal, uCol Thembeka Mbele, uthe emuva kokuzinikela lo mlisa ube esekhombisa amaphoyisa lapho okulahlwe khona isidumbu sengane.
“Umsolwa uholele amaphoyisa ehlathini elisemuva kwaseBlubell Drive, eNorthdale, kwatholakala ikhanda lifihlwe ngaphansi kwembokodo ligoqwe ngezingubo.
“Amaphoyisa aqhubeke aya kwenye indawo eyihlathi lapho bethole isidumbu somfana sesonakele. Umsolwa kulindeleke ukuthi avele enkantolo maduze.”
Isolezwe libike ngoLwesibili ngezinsolo zokuthunjwa kwale ngane umsolwa okuthiwa wayithatha iya esikoleni ngoba ethi ufuna inombolo kanina yocingo.
Unina wayo uNksz Lindiswa Khuboni wathi lo mlisa wabashayela ucingo wathi ingane ikuyena futhi uzoyiletha uma kungabuya umngani wakhe, uNksz Samkelisiwe Mbeje (32) owayeyintombi yakhe.
Ethintwa ngalolu daba uNksz Mbeje uthe namanje akayikholwa into eyenziwe yilo mlisa obeyisoka lakhe ahlukane nalo ngoSepthemba nonyaka emuva kokuthi limtshele ukuthi likhulelise omunye umngani wakhe okungeyena (uNksz Khuboni). Ngokusho kwakhe, bebejwayelene kakhulu noNksz Khuboni ngoba ubemgadela enye ingane yakhe encane kuno-Andile. Uthe akuvumi nokuthi akhulume ngomsolwa ngenxa yesihluku asenzile. Uthe bese bethandane kusuka ngo-2013 nomsolwa kodwa abanangane.
“Ngesikhathi sesikhuluma naye ushilo ukuthi ufuna sihlangane adedele ingane bese ethatha mina. Ngathi ayikho inkinga. Sahamba saya lapho ayethi akuhlanganwe khona kodwa sangabe sisamfica. Ngisola ukuthi wabona amaphoyisa ngoba sasihamba nawo. Nakwezinye izinsuku wathi asihlangane kodwa wangabe esatholakala,” kusho uNksz Mbeje.
Uthe lo mlisa akazi ukuthi yini ebiyenza lo mlisa athi, uNksz Khuboni ugxambukela ezindabeni zakhe ngoba alukho olungako abebeluxoxa naye kanti futhi nesinqumo sokumshiya wazithathela yena.
Izolo, uyise omncane ka-Andile, uMnuz Nkosinathi Fihla, uthe namanje basashaqekile ngokwenziwe yilo mlisa. Uthe uqale washaya unina ka-Andile wamphula ingalo njengoba namanje esafake ukhonkolo.
“Ingane uyinqume wase eyilahla ehlathini, ikhanda belikwenye indawo nomzimba ewushiye kwenye. Akayena umuntu ofanele ukuhlala nabanye abantu. Siwumndeni besifisa sengathi angangadedelwa ngebheyili futhi athole isigwebo esinzima kodwake umthetho ubuye uhambe ngenye indlela,” kusho uFihla.