Bavelile abebedayisa amathikithi omgunyathi
ZIWAKHALELE amadoda amane abanjwe oqotsheni edayisa amathikithi omgunyathi okubuka umdlalo weChiefs nePirates, ozoba ngoMgqibelo.
Lawa madoda amane kuthiwa abedayisa ithikithi ngalinye ngoR500 eWorkshop, eThekwini, aboshwe ngoLwesibili ntambama, avele enkantolo yeMantshi eThekwini, izolo.
Okhulumela amaphoyisa kulesi sifundazwe, uLt Col Thulani Zwane, uthe lawa madoda amane abanjwe ephethe amathikithi angu-110.
Izolo kugcine kungatholakalanga ukuthi icala lawo lihlehliselwe inini ngoba idokodo belingakabuyi enkantolo.
Khonamanjalo amadoda amane aboshwe enkundleni yezemidlalo eMabhida ngoLwesibili ngecala lokweba utshwala nelokufuna umsebenzi ngesitifiketi esingumbombayi. Kulindeleke ukuthi avele eNkantolo yeMatshi eThekwini namhlanje.
ULt Col Zwane uthe la madoda amathathu atholakale notshwala okusolwa ukuthi abuntshontshe ema-bar ale nkundla, ngoLwesibili. Oyedwa kuwo kuthiwa ibisebenzisa isitifiketi esiwumbombayi ifuna itoho lokugada kule nkundla njengoba bekudlala iBafana Bafana neParaguay.
Uqhube wathi amaphoyisa nezinye izinhlaka zezokuphepha zizobe zimi ngomumo njengoba kuzobe kudlala izinkunzi zaseSoweto, ngoMgqibelo. “Abanamathikithi omgunyathi bangazihluphi ngokuya enkundleni, abazodayisa lawo mathikithi nabo bangezi ngoba bazoboshwa.” Usho kanjena nje amadoda amane asolwa ngokuthi ayedayisa amathikithi omgunyathi ngesikhathi kudlala AmaZulu nePirates kanye neChiefs neSupersport ngeledlule asengaphakathi ngemuva kokunqatshelwa ibheyili.