‘INingizimu Afrika kayinamali’
ININGIZIMU Afrika yagcina ukuba nemali eyanele kwisabelozimali sayo ngonyaka wezimali ka-2007/2008, kusukela lapho izwe bese lishodelwa yimali.
Usho kanje owayenguMdonqisi Jikelele eMnyangweni wezimali, uMnuz Lungisa Fuzile, owashiya isikhundla ngo-2017.
UFuzile ubethula ubufakazi kwikhomishini yokulawulwa kombuso yidlanzana ephethwe uiJaji Raymond Zondo eParktown, eGoli.
UFuzile uthe washiya ngenxa yokuthi imibono yakhe yayingasalalelwa.
Ngaphambi kokuthi kufakaze uFuzile kuye kwafakaza uNgqongqoshe wamaBhizinisi kaHulumeni, uMnuz Pravin Gordhan, owayenguNgqongqoshe weziMali ngesikhathi uFuzile esasebenzela uhulumeni.
UGordhan uziphikile izinsolo ze-EFF zokuthi yena nendodakazi yakhe banama-akhawunti ebhange laseCanada esho nokuthi indodakazi yakhe ayisebenzisani nohulumeni.
“Ngiyaqonda ukuthi kunabantu abangihlaselayo kodwa ngiyacela ukuthi bayeke ukufafaza amanga ngendodakazi yami. Ayisebenzisani nohulumeni futhi akukho okubi ekwenzile. Ngiyacela abangihlaselayo bangawuthinti umndeni wami,” kusho uGordhan.
Uthe akazange asule njengelungu lePhalamende emuva kokuhoxiswa esikhundleni sokuba wuNgqongqoshe weziMali yiloyo owayenguMengameli wezwe, uMnuz Jacob Zuma, ngoba wayezimisele ukusiza iNingizimu Afrika njengelungu likahulumeni.
“Seziqalile izinhlelo zokulungisa isimo ezinkampanini zikahulumeni ngoba baningi ababesebenzisa umbuso ukufeza izinhloso zabo,” kusho uGordhan.
Izolo bekukhona abameli balowo owayewukhomishana eSARS, uMnuz Tom Moyane, nabalowo owayenguMqondisi wokuShushiswa koMphakathi, u-Adv Shaun Abrahams.
Namhlanje kulindelwe ukuthi kufakaze uMnuz Dondo Mogajane onguMqondisi Jikelele eMnyangweni weziMali.