Izigidi ezibuyele emuva zingasebenzanga
PHEZU kokuba kuhlale kunesikhalo ngokushoda kwemali yokwenza izinhlelo zokusiza umphakathi, uhulumeni waKwaZulu-Natal ubuyisele emuva imali eyaziwa nge-grant (okuyimali esuke isuka emnyangweni kazwelonke izokwenza izinhlelo ezithile) enguR53.7 million.
Neminyango ehlukene isebenzise ngaphansi kwemali ebiyabelwe yona onyakeni wezimali u-2017/2018 yanxusa ukuthi imali idluliselwe kulo nyaka wezimali.
Lokhu kuvezwe nguNgqongqoshe weziMali kulesi sifundazwe uNkk Belinda Scott ethula isabelo sezimali esibuyekeziwe izolo esiShayamthetho sesifundazwe.
Ubalule iminyango esebenzise ngaphansi kwaleyo mali eyayabelwe yona kodwa ecele ukuthi imali idluliselwe ukuthi isebenze kulo nyaka wezimali.
“Le mali izobuyiselwa emuva kwiNational Revenue Fund ngoba ayizange isetshenziswe.
“Inkulu kakhulu imali ebuyiselwe emuva uma uqhathanisa noR3.586 million obubuyiselwa emuva eminyakeni edlule.”
Phakathi kwemali ezobuyiselwa emuva eyeCAPS grant enguR34.3 million, iSocial Worker Employment grant enguR17 million, uR1 million weLPID grant, uR109 000 wokudla kwezingane ezikoleni noR511 000 weSocial Sector EPWP Incentive Grant.
UNkk Scott ubale noMnyango wezokuBusa ngokuBambisana neziNdaba zoMdabu okunemali enguR53.5 million ongayisebenzisanga onyakeni wezimali odlule ngakho ocele ukuthi imali enguR29.9 million idluliselwe kulo nyaka.
“Le mali eyezimoto, ifenisha, amakhompyutha nezinye izinto okubalwa abafana bokuvimba izulu namathangi amanzi.
“Owezokuthutha awusebenzisanga uR250 million ngakho uR222 million uzodluliselwa kulo nyaka.
“UR172 million uzobhekela izinhlelo zesomiso bese kuthi uR50 million wakhe izinhlelo zokulwa nobugebengu phakathi kwalesi sifundazwe neMozambique,” kusho uNkk Scott.
UMnyango wezeNhlalakahle usebenzise ngaphansi kwesabelo kwasala imali enguR70.1 million, uR16.4 million ozodlulela kulo nyaka ukuze wenze izinhlelo.
Uthe kwengezwe imali kwingqalasizinda yezikole njengoba kufakwe uR150 million, owokuvuselela izikhungo zezempilo okufakwe uR199.5 million. Izinhlekelele zabelwe uR11.3 million.
Uthe kushode imali ohlelweni lwezokuthutha abafundi eshode ngoR125 million ngoba okwamanje bathutha abangu-55 568 nabanye abangu-2 933 baseNquthu abaphoqwa yinkantolo ukuthi bathuthwe.