Abezinhlaka ezehlukene kweyeTheku
IHLOSE ukuthi zonke izinhlaka zomphakathi zibe neqhaza ekuthuthukiseni umnotho ingqungquthela iShape Durban eqale izolo eNkosi Albert Luthuli International Convention Centre.
Lokhu kugcizelelwe uMnuz Phillip Sithole oyiPhini leMenenja ophikweni lokuThuthukiswa koMnotho kuMasipala weTheku othe bebodwa ngeke benze lutho ngaphandle kwezinye izinhlaka. Uthe bakhethe ukumema abavela kuzo zonke izinhlaka zomphakathi ngoba wonke umuntu angaba neqhaza ekukhuliseni umnotho.
“Kumele sifake wonke umuntu ezinhlelweni zokwakha idolobha lethu. Kulo nyaka sizobheka imigomo ebesizibekele yona eminyakeni eyisihlanu edlule sibone ukuthi yikuphi esingakushintsha kweminye iminyaka ezayo,” kuchaza yena.
Uncome umasipala ngezinhlelo zawo zokuthuthukisa umnotho weTheku elinganisa ngophiko olubizwa nge-Invest Durban, olukhuthaza ukutshalwa kwemali. Uveze nokuthi bakukhathalele nokusebenzisana nezinye izinhlaka ukukhulisa iTheku ngayo yonke indlela.
OnguMqondisi oMkhulu ehhovisi likaMgcinimafa, uMnuz Dondo Nogajane, uthe kumele ingayekwa indaba yokulwa nenkohlakalo ngoba iyona ebambezela ukukhula komnotho. Uthe leli yigciwane elihlasele ngisho amabhizinisi azimele. Uveze ukuthi emuva kokwethulwa kwesabelo sezimali sesikhashana muva nje, abatshali bezimali bakwamanye amazwe bakhombise ukulahla ithemba emnothweni wakuleli. Oyisikhulu esiphezulu seDurban Chamber of Commerce and Industry (DCCI) uNkk Palesa Phili, uthembise ukuthi bazokwenza konke okusemandleni ukudala amathuba omsebenzi ngokubambisana nohulumeni. Uthe baphinde bafaka iziphakamiso kuMgcinimafa ukuqhamuka nezindlela zokulwa ngokungakhokheleki ngesikhathi kosomabhizinisi abancane athe kuyabawisa.
UMnuz Musa Makhunga onguMengameli weDCCI uthe sekuyisikhathi sokuthi kushintshwe indlela yokucabanga ukuze kukhuliswe umnotho.
“Kumele sikhulume ngokubheka amathuba amabhizinisi kunokubheka awomsebenzi. Abantu kumele baphokophelele ukuba nengcebo kunokuthola umholo ophelayo. Amathuba awadingi ngisho isitifiketi kodwa kubhekwa ukuthi ucabanga kanjani. Lokhu kumele sikukhuthaze ngisho entsheni ephuma emanyuvesi ukuthi ibheke amathuba,” kusho uMakhunga.
Ukhale ngokudonsa kanzima kosomabhizinisi abancane wathi kungasiza nokuthi kube nebhange elizoxhasa bona kuphela. Ezinye izikhulumi zayizolo kube nguNksz Mandisa Ntombela weGlobal Shapers Durban Hub, Mnuz Terry Roseberg onguSihlalo weMultiply Group kanti uhlelo beluphethwe uNksz Fifi Peters ongumethuli wezinhlelo kwiCNBC Africa.
Ingqungquthela ezophela ngoLwesihlanu izobheka izinhlelo nemigomo eyenziwa ngo-2013 iphinde iqhamuke nomhlahlandlela weminye iminyaka eyisihlanu ezayo.