Awasafuneki amava kwabakahulumeni
IDUBUKELE kwabafuna umsebenzi bengenawo amava njengoba kusuka ngonyaka ozayo ngeke esafuneka eminyangweni kahulumeni ezikhaleni ezisemazingeni aphansi.
Lokhu kuvezwe nguNgqongqoshe weziSebenzi zikaHulumeni nokuPhatha, uNksz Ayanda Dlodlo, othe kusuka ngoEphreli 1, 2019 ngeke esafuneka amava emazingeni aphansi.
Ngalokhu kuhloswe ukwehlisa izinga lokungasebenzi, ikakhulu entsheni esuke iphuma ezikhungweni zemfundo neziqu kodwa ingenawo amava omsebenzi.
“Lokhu kuzosusa nemigoqo ebikhona emnyangweni kahulumeni engenasidingo. Kuzoheha abantu abasha abazongena kuhulumeni abebevinjwa amava.”
Uthe kodwa kweminye imikhakha okubalwa owezobunjiniyela nowezobudokotela ngeke kushintshwe kuzoqhubeka njengoba kunjalo. UNksz Dlodlo uyalele umnyango wakhe ukuthi ukhiphe isekhula uyalele iminyango ehlukene ukuthi ilungele lokhu kusuka ngonyaka ozayo.
Lesi siphakamiso ngesinye okwavunyelwana ngaso engqungqutheleni ye-ANC nyakenye eNasrec. Uphiko lwentsha lwe-ANC yilona obeluhlala lukhala ngokuthi abantu abasha abakwazi ukuthola imisebenzi kuhulumeni ngoba bafunwa amava.
Umnyango uzoqhamuka nohlelo lokuthi abafaka izicelo besebenzisa ifomu uZ83 bakwenze lokhu besebenzisa i-internet.
“Siphendula izikhalo zabantu abasebenzisa izinkundla zokuxhumana abakhala ngokuthi kuthatha isikhathi ukufaka isicelo ngefomu. Sizizwile izikhalo zabantu abasha yingakho sifuna kushintshwe kusetshenziswe ubuchwepheshe uma befuna umsebenzi.”
Uthe labo abazoqhubeka bafake izicelo ngamaphepha zizoqhubeka zamukelwe ngoba bayazi kunzima kwabanye ukuthola izindawo ezine-internet.
Uqhube wathi bazoqhubeka nezingxoxo nomasipala ukuze kusheshiswe ekutheni kube nezindawo ezizoba neWiFi ukuze kube lula kulabo abasuke befuna umsebenzi ukuthi bafake izicelo zabo nge-internet.