Bakhuthaza eyokuvikelwa kwabesifazane nezingane
INHLANGANO elwa nokuhlukunyezwa kwabesifazane nezingane, iMenEngage Africa Alliance, ithe ukuvikelwa kwabesifazane namantombazane kungenzeka futhi kufanele kube yinto eseqhulwini kohulumeni nakuwo wonke umphakathi.
UMnuz Desmond Lunga, onguSihlalo weMenEngage Africa Alliance, uthe lokhu kufanele kube yinto esemqondweni wawo wonke umuntu njengoba kulungiselelwa ukugujwa kwe-16 Days of Activism for No Violence Against Women and Children okuwumkhankaso waminyaka yonke ovame ukugujwa kusukela ngoNovemba 25 kuze kube nguDisemba 10.
Uthe sekunesikhathi eside kuhlukunyezwa abantu ngokobulili ngokuthi abantu bathule, (basabe) ukucwaswa, bazenyeze. Uthe lokhu kwenze anyuka kakhulu amazinga okuhlukunyezwa kwabantu ngokobulili.
Noma kunjalo, uLunga uthe kule minyaka eyedlule sekuke kwaba nemikhankaso ekhombise isibindi sezinhlangano ezisebenza nemiphakathi nalabo abake baba abagilwa behlukunyezwa ngokobulili. Kule mikhankaso ubale i#Metoo, #TimesUp nomkhankaso owasusa ukukhuluma i#MenAreTrash neminye.
“Uma kukhona isifundo okufanele sisifunde kule mikhankaso wukuthi ukungakhulumi ngokuhlukunyezwa kwabantu ngokobulili akuyona into okufanele yenziwe uma sifuna ukuqinisekisa ukuthi siyalwa nalesi sihlava emindenini yethu nasemphakathini wonkana,” kusho uLunga.
Ukhuluma kanjena nje kusanda kuba nengqungquthela ebibhunga ngokuhlukunyezwa kwabantu ngokobulili eyayihanjelwe nguMengameli wezwe uMnuz Cyril Ramaphosa.
Uthe banxusa abantu besilisa nezingane ukuthi babambisane nalabo abathi akuqedwe ukuhlukunyezwa kwabantu ngokobulili.