Usola umona odilizelwe isitolo
USOLA umona usomabhizinisi waseNtuzuma odilizelwe isitolo asedayise kuso iminyaka engu11, okusolwa ukuthi kukhona okhale ngaso kuMasipala weTheku.
UMnuz Nduduzo Magwaza (37) obengumnikazi weYoung Minds Tuck Shop esemgwaqweni uMabhunu kwa-F eNtuzuma, uphithene ikhanda kusuka kudilizwe isitolo sakhe ngoLwesihlanu.
Ukhala ngokuthi ikhonteyna abeyenze isitolo iklajwe yaba izicucu ngabasebenzi bakamasipala abebehambisana namaphoyisa.
Kule khonteyna ubedayisela aphinde ayenze ihhovisi lokudweba amaplani ezindlu.
Uthe wayilandela imigudu yokusebenza futhi nomphakathi ungenankinga. Uveze ukuthi inkinga bekuwukuthi umgwaqo obhalwe ngayo awukakaveli ohlwini lukamasipala, obekubambezela nokuthi athole incwadi ephelele yokusebenza.
Udaba lokokususwa kwesitolo luqale ukushuba ngenyanga edlule uMagwaza ethola incwadi emxwayisayo.
Incwadi ebhalwe wuMasipala ngoOkthoba 29 iveza ukuthi ikhonteyna kumele isuswe ngoba iphazamisa ukuhamba kwabantu nezimoto.
“Emuva kokuthola incwadi ngaya ekhanseleni ngiyolibikela. Labhala incwadi licela uphiko lwamabhizinisi kumasipala ukuthi ikhonteyna ingasuswa. Ngaphinde ngaqoqa amagama omphakathi osayine incwadi usho ukuthi awunankinga ngokubekwa kwekhonteyna njengoba bekukhona ofake isikhalo ekhala ngokuthi kugcwala kuyo izixuku,” kuchaza uMagwaza.
Uveze ukuthi wazihambisela mathupha incwadi emahhovisi kamasipala emuva kosuku ethole