Kuvele amahlazo kuMhlathuze Water
UMCWANINGI-MABHUKU Jikelele uvundulule amahlazo kuMhlathuze Water okuvele ukuthi kunempahla ebalelwa kuR1 billion yalolu hlaka engabhalisiwe emabhukwini awo nebingebiwa kalula ingabonakali.
Umbiko kaMnuz Kimi Makwetu walo nyaka udalule ukuthi buningi ubudedengu obukhombise ukunganaki ezikhulwini nabasebenzi nokuhlanganisa inkohlakalo. Uphakamise ukuthi kumele bavulelwe amacala bonke abathinteka ezenzweni zenkohlakalo ebidla lubi kuMhlathuze Water eminyakeni eyedlule.
Usihlalo osabambile webhodi, uMnuz Mthokozisi Duze, uthe bawamukele umbiko kaMcwaningi-Mabhuku ngoba ubavule amehlo ngezinto eziningi abebengaziboni.
“Singasho nje ukuthi okunye okuphakanyiswe yilo mbiko njengokulwa nenkohlakalo sesiqalile ukukusukumela. Laba basebenzi abathintekayo ezenzweni zenkohlakalo sizobathathela izinyathelo zomthetho sibavulele amacala,” kusho uDuze .
Uthe phakathi kwempahla ebingabhalisiwe kuMhlathze Water kodwa okungeyawo kubalwa izimoto, izakhiwo nokunye okuyizinsiza zokusebenza kwalesi sikhungo esikhiqiza amanzi.
Uthe bazokwenza isiqiniseko sokuthi yonke le mpahla ibhaliswa yonke ukuze yaziwe kuMhlathuze ngenhloso yokugwema ubugebengu nenkohlakalo.
Ubuye waveza ukuthi kumanje basebenza kanzima ukuqinisekisa ukuthi uMhlathuze Water usahamba phambili KwaZulu-Natal ukuba yisikhungo esihlinzeka amanzi emphakathini nasezikhungweni ezizimele.
Uthe kumanje balinde uNgqongqoshe wezaManzi neNhlanzeko, uMnuz Gugile Nkwiti ukuba aphothule uhlelo lokuqokwa kwebhodi entsha njengoba okwamanje kusabambe elesikhashana.
Uthe lokhu balinde ukuba kwenzeke ngaphambi kokuba kuphele lo nyaka.