Isivumelwano esizosiza abamatekisi
BASWELE amaphiko okundiza abemboni yamatekisi asebeyingxenye yesikhungo esibolekisa ngemali yokuthenga amatekisi. NgoMsombuluko, iSouth African National Taxi Council (Santaco) ithenge u-25% weSA Taxi ngoR1.7 billion.
UMengameli weSantaco kuzwelonke, uMnuz Phillip Taaibosch, uthe bayaziqhenya ngokuthenga ingxenye yeSA Taxi ngoba kudala befuna ukuba neqhaza elibonakalayo kukho konke okuthinta imboni yamatekisi.
“Siyaziqhenya ngokuthi emva kweminyaka sixoxa neSA Taxi sigcine sesithola ingxenye ethile yayo. Lokhu kusho ukuthi imboni yamatekisi izoba neqhaza elibonakalayo embonini yezimali ngoba iSA Taxi ixhasa abafuna ukuthenga amakhumbi. U-25% wethu uzoqinisekisa ukuthi siyahlomula ngemali esizoyithola kumadividends bese siyidlulisela ezifundazweni ukuze ithuthukise imboni yethu. Kade sasifuna ukungena emkhakheni wezimali ngakho siyajabula ukuthi sesize salithola ithuba,” kusho uTaaibosch.
AbeSA Taxi bathe isivumelwano sabo neSantaco singenxa yokusebenzisana kahle iminyaka kahle nale nhlangano. Bathe sizosiza imboni yamatekisi ukuthi ingenise enye imali ngokuba semkhakheni wezimali. Bazokwazi ukubolekwa imali yokuthuthukisa amabhizinisi abo, babe nomshwalense ongambi eqolo okusho ukuthi bazokwandisa amathuba omsebenzi embonini yabo.
Bathe isivumelwano sabo neSantaco sibalulekile ngoba amatekisi athutha izinkumbi zabantu nsukuzonke okusho ukuthi abanikazi bawo badinga ukuba nezwi ezinkampanini ezibaxhasa ngemali nomshwalense.
Uthe ukungena kweSantaco kwiSA Taxi kusho ukuthi nayo isilandela imithetho yeBroad Based Black Economic Empowerment (BBBEE). Kuzoxhasa izinhlelo zeSantaco zokuthuthukisa ingqalasizinda nokuletha impilo engcono kubagibeli.
ISantaco ikhokhe ingxenye ethile yalo R1.7 billion ukuthenga u25% weSA Taxi kwazise iye yaboleka uR1.2 billion eStandard Bank nakwiFuturegrowth Asset Management. I-SA Taxi ithe izosebenzisa uR1 billion ukukhokha izikweletu zabantu abanamasheya kuyo bese imali esalayo isetshenziselwe ukukhulisa le nkampani.