Kuvikelwa amantombazane kwizifo zocansi
UHLELO lokuvikelwa kwamantombazane ukuthi angatheleleki ngezifo zocansi olwenziwa yiNyuvesi yaseIllinois, eChicago, e-United States of America, luzokwenziwa kuleli.
Lolu cwaningo oluzokwaziwa nge-A Multilevel Comprehensive HIV Prevention Package for South African Adolescent Girls and Women oluzokwenziwa yiDesmond Tutu HIV Foundation eNyuvesi yaseKapa, lususelwe ocwaningweni obelwenziwa yiNyuvesi yase-Illinois.
Lolu cwaningo luveza ukuthi kunesidingo esikhulu sokuthi kube nezinhlelo zokuvikela amantombazane kwizifo zocansi kuzo okubalwa negciwane lengculazi .
USolwazi Linda-Gail Bekker wase-University of Cape Town obengomunye wabacwaningi kwi-Informed, Motivated Aware and Responsible About Aids (Imara) okuwucwaningo obelenziwa eChicago, uthe kunesidingo esikhulu sokuthi kube nohlelo lokusiza amantombazane kuleli ngenxa yezinombolo eziphezulu zokutheleleka kwawo ngezifo zocansi.
“Sidinga ukwenza okuthile ngokushesha, alinganiselwa ku-2 000 amantombazane nabesifazane abasebencane abatheleleka ngegciwane lengculazi ngesonto kuleli,” kusho uSolwazi Bekker.
Uqhube wathi i-Imara inezinhlelo ezifana nokufundiswa ngezifo zocansi kuzo okukhona neHIV, lubuye lufundise ngezindlela zokudalulelana izifuba phakathi kukamama nendodakazi , amasu angasetshenziswa umama ukuze indodakazi yakhe ithathe izinqumo eziphusile ngempilo yayo, indlela yokuziphatha uma isinothandana naye, nokunye.
USolwazi uBekker uthe okwamanje lolu hlelo kuleli, luzoqala ngohlelo lokuzwa amanzi ngobhoko oluzoba nomama namadodakazi abangu-50.