Aseneme ngokugqoza kwentuthuko
MLHLELI: Iqembu iDA KwaZuluNatal lemukele amalungu angaphezu kuka-100 eMshwathi.
Siphinde semukela amalungu amasha angaphezu kwayikhulu eMbalenhle, Ozwathini.
Lokhu kuveza ngokusobala ukuthi abantu bayabona ukuthi iDA izimisele ukuletha uguquko oluzokwenza impilo engcono ebantwini.
Iningi lalawa malungu esiwemukele, avela kwi-ANC ne-IFP. Akhala ngokuthi la maqembu awazibhekeli izidingo zawo.
Umsebenzi welinye lamakhansela ethu, uMnuz Vincent Mncwabe, uyancomeka ngoba wuye, esebenzisana nozakwabo, oqinisekise ukuthi kugcine sekufakwe ugesi kule ndawo.
Kumanje balwela indaba yamanzi nomgwaqo oyitiyela.
Ngesikhathi sivakashele kule ndawo, sithole ukuthi amaloli amanzi ayenokufika kodwa sekunesikhathi engasafiki.
Kuze kwadingeka ukuthi uMncwabe awathenge amanzi ukuze umphakathi uthole ukusizakala.
I-DA kayeneme ngokukhishwa inyumbazana kwabasemakhaya. Sikholelwa ekutheni nabo kumele bathole izinsiza nentuthuko ezindaweni zabo.
Okwasiphatha kabi kakhulu mhlazane sihambele le ndawo, yisibalo sentsha eyayizothamela umcimbi wokwamukela amalungu amasha.
Lokhu kwasivezela ngokusobala ukuthi umsebenzi awutholakali.
Usemkhulu umsebenzi okumele wenziwe ukuze silubone ushintsho.
Kubuhlungu ukuthi isingaphezu kwewu-20 iminyaka abantu bevota kodwa kuze kube manje abakabinawo amanzi.
Uma ubuka izindawo okubusa kuzo iDA uyabona ukuthi lukhulu uguquko esilwenzile ngesincane \ isikhathi lesi.
Abantu bahlushekiswa ngabaholi abangogombela kwesabo. Inkohlakalo igqame bha komasipala abaphethwe yi-ANC.
Siyaqhubeka nomsebenzi wokunxusa abantu ukuthi bazikhulule ebubheni ngokuthi bakhethe iDA.
Siyawamukela amalungu amasha futhi singasho singananazi ukuthi ngeke azisole ngesinqumo asithathile.
Esesikubeka kubo wukuthi baqinisekise ngosuku lokuvota ukugqugquzela abanye ukuthi baphume ngobuningi babo beyovotela ushintsho. Hlengiwe Shozi Likasihlalo weDA eKZN