Inkampani eyakha imikhiqizo yokuhlanza
UGQUGQUZELE abantu ukuthi bathenge imikhiqizo eyenziwe KwaZulu-Natal uMnuz Stanley Zulu wenkampani ekhiqiza amakhemikhali okuhlanza izindlu namafemu iChemweb.
UZulu wasungula iChemweb ngo-2008 ngenhloso yokuthuthukisa umnotho waKwaZulu-Natal nokudala amathuba omsebenzi.
“Ngaphambi kokuvula inkampani yami ngase ngisebenze iminyaka engaphezu kuka-30 ngisophikweni lwe-innovation engineering. Enkampanini engangikuyona ngafika nginomatric kodwa ngokusebenza ngokuzikhandla ngasebenza kuzo zonke izinhlaka njengoba ngagcina sengikhuphukele kwa-innovation engineering,” kusho uZulu.
IChemweb yibhizinisi lomndeni njengoba uZulu esebenzisana nomkakhe uNkk Lerato Zulu, nabashana bakhe uNatasha noManqoba.
UNatasha uyi-accountant eqeqeshiwe futhi usawenza namaarticles akhe kodwa wakhetha ukusebenza eChemweb ngoba ebona ukuthi umalume wakhe uzimisele ukuthuthukisa umnotho namakhono abantu abasha.
Phakathi kwezingqinamba ababhekane nazo ngesikhathi besanda kungena eChemweb babale umncintiswano wentengo yemikhiqizo njengoba kunezinye izinkampani ezivele zehlise intengo ngoba zifuna ukuheha amakhasimende.
“Thina sakha amakhemikhali okuhlanza asezingeni eliphezulu futhi siwadayise ngentengo ekahle. Ubuye uthole ukuthi abantu bazothenga kwezinye izinkampani ezinamakhemikhali okuhlanza ashibhile kodwa uma sezibona izinga lawo bathole ukuthi aziwenzi umsebenzi ofanele bese bebuya. Ngaso sonke isikhathi uma sikhiqiza senza isiqiniseko sokuthi izinga liphezulu ukuze abantu basithembe.
“Imikhiqizo yethu ilandela imigomo yakwaSouth African Bureau of Standards neyeInternational Organisation for Standardisation,” kusho uZulu.
UZulu ubesohlelweni lweDurban Chamber of Commerce and Industry ebilwenza ngokuhlanganyela neTransnet oluqeqesha osomabhizinisi.
Uthe lumsizile kakhulu ngoba lumvulele amathuba okuzikhangisa emibukisweni emikhulu nokuthi aqeqeshwe yizazi kwezamabhizinisi.
IChemweb isebenzela esikhungweni iSmall Enterprise Development Agency esikuJohannes Nkosi Street, eMakethe.
UNatasha uthe ukuba kwabo kule ndawo kuyabasiza ngoba ngosuku ihanjelwa abantu abawu-2 million futhi bahlale benza imikhiqizo ehlukene ezojatshulelwa yibo bonke.
Ubalule ukuthi ngaphandle kwamakhemikhali okuhlanza banomkhiqizo omusha osetshenziselwa ukupholisha obizwa ngeSealright.
“Sihlukile kwezinye izinkampani ngoba sidayisa imikhiqizo esezingeni. Siyazikhangisa ezinkundleni zokuxhumana futhi sifuna ukuvula isitolo esizotholakala kwi-internet. Kusisizile nokuthi umalume abe sohlelweni lweDurban Chamber ngoba sihlangene nabantu abaningi sakwazi ukuzikhangisa. Inhloso yethu wukubona amakhemikhali ethu esetshenziswa e-Afrika yonkana,” kusho uNatasha.
UNkk Zulu uthe banabasebenzi abahlanu abaqashwe ngokugcwele kube ababili abazofunda umsebenzi noyedwa oyitoho.
“Siyazithatha izitshudeni ze-engineering ezidinga isipiliyoni futhi ziphuma sezifunde okuningi njengoba siyinkampani encane. Azigcini ngokuxuba amakhemikhali kodwa zigcina sezingena nasemkhakheni wokudayisa impahla zifunde ukuthi sikhangisa kanjani,” kusho uNkk Zulu.