Lihlehlile elabasolwa ngokuqotha umndeni

LIPHINDE lahlehliswa ngenxa yezinkinga zikagesi enkantolo icala lamadoda amabili asolwa ngokubulala amalungu ayisikhombisa omndeni wakwaKhoza waseVlakfontein abulawa agqitshwa endlini.

Bekulindeleke ukuthi abasolwa bafake isicelo sebheyili eNkantolo yeMantshi eLenasia emuva kokuthi kuhlehlisiwe ngoLwesibili ngoba kuphele ugesi kule nkantolo.

Imantshi, uNkk Maggie van der Merwe, ilidlulisele eNkantolo yeMantshi yaseProtea icala elibhekene noMnuz Fita Kuphe (61) noMnuz Ernest Mabaso (27) lapho kulindeleke ukuthi lilalelwe namuhla. Nayizolo inkantolo beyigcwele amalungu omphakathi aseka amalungu omndeni wakwaKhoza.

Laba basolwa babhekene namacala okubulala amalungu omndeni wakwaKhoza ayisikhombisa uNksz Mbali Khoza (51), nodadewabo uNksz Dudu Khoza (46) indodakazi yakhe uNksz Nomfundo Khoza (28) nabazukulu uKarabo (11), uLuyanda (7) , uNkanyiso (2) noSibongakonke (2).

Kuthiwa iNkantolo yaseLenasia izovalwa amasonto amabili ngesikhathi kulingiswa inkinga kagesi. Izidumbu zamalungu omndeni akwaKhoza zitholwe ngo-Okthoba 29 nonyaka zigqitshwe endlini abanye babo bekopolotwe amehlo emuva kokuthi begcine ukubonakala ngo-Okthoba 19. UMabaso kuthiwa wafika kulo mndeni bamethemba ezenza isihlobo sakhona esizalwa elinye ilungu lomndeni elashona. Wayaziwa ngoSibusiso Khoza ngesikhathi ehleli nalo mndeni. UKuphe kuthiwa bese kuneminyaka elinganiselwa kwengu-15 ethandana nomunye walaba ababulawa.

Okhulumela iNational Prosecutions Authority uNksz Phindi Mjonodwana uphinde wakuqinisekisa ukuthi uMbuso uzosiphikisa isicelo sabo sebheyili.

Uthe bazokwenza konke okusemandleni ukukhombisa ukuthi abasolwa abafanele ukuphuma ngebheyili kodwa wathi yize kunjalo angeke aqagele isinqumo esizothathwa yinkantolo.