ABantwana babuye nephuzu e-Uruguay
kuneqembu lamantombazane lika-Under 17 lango-2010 elashaywa kuyona yonke imidlalo yamaqoqo emqhudelwaneni owawuseTrinidad & Tobago.
Umqeqeshi waBantwana, uSimphiwe Dludlu, ukugcizelele ukuthi leli bekuyithuba lokufunda kuyena nakubadlali njengoba lihlale obala igebe elikhona ekuthuthukisweni emantombazaneni akuleli nawakwamanye amazwe.
“Sifikile, sabona, safunda kakhulu. Namuhla kube wumdlalo wethu omuhle yize sihluliwe. Emizuzwini ewu-10 singenelwe amagoli saphinde sathola nekhadi elibomvu. Ukushaya amagoli bekuzowushintsha umdlalo. Ngisho ngesikhathi behamba phambili angicabangi ukuthi iBrazil ibingaphezulu kwethu,” kusho uDludlu onesitifiketi sokuqeqesha se-Uefa B Licence.
Uthe uyayibona nemibono yabebethi besingekho isidingo sokuthi iqembu liye kwiNdebe yoMhlaba.
Abantwana bahlulwe nayiJapan ngo 6-0, kanti emdlalweni wokuqala babambana neMexico ngo 0-0.
“Isipiliyoni awusithengi futhi akekho okunika sona njengesipho. Kumele ube phakathi empini uyozilwela ufunde ukuze ukhulume ngento oyaziyo.
Ngize lapha njengomfundi webhola ofuna ukuthuthukisa ibhola labesifazane. Abadlali bazobuyela ekhaya bayotshela abanye ngokubaluleka kokwenza kahle,” kusho uDludlu.
Uthe uyethemba ukuthi isipiliyoni esitholwe abadlali sizobasiza noma sebekhuphukela eqenjini lika-Under 20 nakwiBanyana Banyana.
Ngokwakhe isifundo esikhulu abuye naso wukubaluleka kokudlala namaqembu omhlaba kweyobungani.