OwayekwiChiefs uthipha iPirates
UKUNGASHESHI kodonga lweKaizer Chiefs yikona okuzophenduka isitha sayo uma isibhekene nezimbangi zayo ezinkulu i-Orlando Pirates kwisemi final yeTelkom Knockout (TKO), ezoba ngoMgqibelo eMoses Mabhida Stadium ngo-3 ntambama.
Lokhu kushiwo uSithembiso “Imoto Entshontsh’mali” Ngcobo obegijimela Amakhosi eminyakeni edlule.
UNgcobo uthe ngokwakhe uthipha iPirates ukuthi iyona ezonqoba lo mdlalo, ngenxa yokuthi abagadli bayo bayashesha kakhulu uma behlasela, kanti emuva kwiChiefs izitobha azisheshi ngokufanele. “Ishesha kakhulu iPirates uma ihlasela. Imidlalo esadlalwe iBucs uma uyiqhathanisa nedlalwe iChiefs uyabona ukuthi igebe likhulu kakhulu. Umdlali onjengoJustin Shonga uyibulele iChiefs kowabakhaya eFNB Stadium. Unobuhlakani obuyisimanga, futhi uyabaqonda bonke abadlali adlala nabo. Kuzofanele ithimba labaqeqeshi beChiefs liqhamuke neqhinga lokuthi ngabe lizomelana kanjani nokushesha kwabadlali bePirates, kungenjalo eZimnyama zizonqoba.”
Nakuba le nsizwa yaseNdwendwe isiwagaxe emgibeni amakhokho kodwa abaningi basakhumbula njengayizolo mhla ingcwaba lona iBhakabhaka kowamanqamu emqhudelwaneni ofanayo ngo2010.
UNgcobo wavalela phakathi amagoli amabili, ngesikhathi Abafana Bokuthula Noxolo benqoba ngo 3-0, eFNB Stadium. Igoli lesithathu leChiefs lashaywa uSiphiwe “Shabba” Tshabalala.
Ngokusho kukaNgcobo, izinto azikahlangani kahle kwiChiefs okwamanje, nakuba ekholelwa ekutheni umqeqeshi weGlamour Boys uGiovanni Solinas kukhona angakwenzela Amakhosi uma enikwa ithuba.
“Ngike ngasebenza noSolinas ngisekwiFree State Stars. Ungumqeqeshi osezingeni eliphezulu kakhulu, futhi ngiyakholelwa ekutheni kukhona angakwenzela iChiefs. Inkinga nje ukuthi ufike ngesikhathi esibi, njengoba bese kuphele iminyaka emithathu iqembu linganqobi lutho. Uma ezonikwa ithuba, uzogcina ehlanganise kahle. Uzokhumbula ukuthi neMamelodi Sundowns ngaphambi kokuthi kufike uPitso Mosimane ike yaba nendlala yezicoco, neManchester United kuke kwaba ngesifanayo kwaze kwalamula uJose Mourinho eyiwinisa isicoco se-Uefa Europa League,” kusho uNgcobo othe abalandeli abazoya eMabhida ngoMgqibelo ufisa baye ngenhloso yokuyobuka ibhola hhayi yokuyolwisa abadlali ngoba lokho akukuhle neze.