Azodlala kude nasekhaya awePSL
IKAIZER Chiefs neFree State Stars, okuyiwona maqembu angamathemba ePremier Soccer League (PSL) kwiCAF Confederation Cup, bazoyidlalela kude nasemakhaya imidlalo yomlenze wokuqala ngenxa yezinkinga nokunye okuchazwe njengokuyisa ibhola kubantu.
Amakhosi, atonyulwe neZimamoto FC yaseZanzibar, ngeke awudlalele eFNB Stadium, eGoli, umdlalo wawo womlenze wokuqala ngoNovemba 28.
Kujwayelekile ukuthi iChiefs ingayidlaleli ekhaya imidlalo yayo okumele iyigijimele enkundleni yayo kungakhathalekile noma oweligi kumbe owomkhumulajezi.
IChiefs ikhiphe isitatimende iqinisekisa ukuthi lo mdlalo uzoba seNelson Mandela Bay Stadium, ePort Elizabeth.
Ibuyele emiqhudelwaneni yase-Afrika okokuqala kusukela ngo-2016 lapho ikhishwe khona yi-ASEC Mimosa yase-Ivory Coast kwiCAF Champions League.
Konke kubheke kuGiovanni Solinas ukuthi aqede izinkulumo ezihlale zivela ngeChiefs ukuthi ayikuthandisisi kahle ukudlala le miqhudelwano yezwekazi.
Kuthiwa bakhala ngokuthi kugcina sekudla bona imali ekubeni intshontsho elihambisana nokudla isicoco lincane kakhulu.
Nakuba iChiefs ibhekene nenkinga yokubuyisela izinduku kwi-Orlando Pirates ebhekene nayo kwiTelkom Knockout eMoses Mabhida Stadium eThekwini, ngoMgqibelo, uSolinas uzobe ebheke ngeso elilodwa lo mdlalo naleli qembu elingenamlando otheni ebholeni lase-Afrika.
IFree State, engene lapha ngokudla isicoco seNedbank Cup, nayo ngeke idlalele ekhaya eBethlehem kodwa yona ibanjwe umthetho yase icela ukuyonkashela eBidvest Stadium, eGoli.
Ngosuku olufanayo nolweChiefs, iFree State, esanda kukhomba indlela uLuc Eymael okunguyena oyifake kwiConfederation Cup, izonqwamana neMukura Victiry Sports yaseRwanda.
Izodlalela eGoli nje, yingoba umthetho weCAF awuvumi ukuthi iqembu lihambe emgwaqweni amakhilomitha angaphezulu kwawu-200 uma lisuka lapho lisuke lihlale khona ngendiza.
Ngoba iGoble Park ikude kakhulu iFree State icele kwiWits bavumelana ngokubolekana inkundla.
Ngemuva kokudlala eNingizimu Afrika la maqembu womane azophinde atholane phezulu eRwanda naseZanzibar ngokwahlukana ngoDisemba 4 kuya ku-5.
Uma la maqembu enqoba iChiefs izobhekana noyedwa phakathi kwe-ASSM Elgeco Plus noma iDeportivo Unidad emzuliswaneni olandelayo.
Kuke kwaba nokubambeka kokudedelwa kohla lwemidlalo kodwa iCAF isiphinde yashintsha yize obekumisile kungakaguquki.
Indaba isekuqhatheni amaqembu aseMorocco lapho kukhona amabili alindile bese kuba yiRaja Casablanca edlala kowamanqamu walo mqhudelwano ne-AS Vita.
Umlenze wokuqala useMorocco ngoNovemba 25 bese kuthi owesibili ube seDemocratic Republic of Congo (DRC) ngoDisemba 2.