UMlangeni noKekana bazoqopha ngokuhlanganyela

IZINGWAZI zomculo zakuleli ezikhubazeke ngokungaboni uSteve Kekana noBabsy Mlangeni, zizoqopha ngokuhlanganyela kwi-4th We Can Arts Festival esePlayhouse Opera Theatre eThekwini ngoNovemba 24 kusukela ngo-7 ebusuku.

USteve wazakhela udumo ngenoni elithi Take Your Love And Keep It (enoNana Cayote), Feel So Strong (enoPJ Powers) neBurn Out (enoSipho Mabuse) kanti uBabsy waziwa ngeSala Emma nethi Unalo Na Ithikithi. I-We Can Arts Festival yasungulwa ngo-2015 ngenxa yosizi olukhungethe amaciko aphila nokukhubazeka eNingizimu Afrika.

Umgqugquzeli walo mcimbi uThabani Mazibuko uthe ingakaqali i-We Can Arts Festival beyingekho inkundla lapho amaciko anokukhubazeka abehlangana khona adingide ngezinkinga eziwakhungethe futhi aqhakambise ikhono lawo.

“Yize uhulumeni wethu enza umsebenzi oncomekayo ukubungaza nokusiza abantu abanokukhubazeka kodwa usemkhulu umsebenzi ekuvaleni igebe phakathi kwabantu abajwayelekile nabanokukhubazeka, yingakho saqhamuka nalolu hlelo.” Uthe lo mcimbi ukhula usuku nokusuku selokhu wasungulwa. “Njalo ngonyaka sibheka impumelelo yalo mcimbi bese sixhumana nababambe iqhaza ukuze siwubeke ezingeni elicokeme futhi sifeze inhloso. Eminyakeni emithathu eyedlule sibonile ukuthi abantu abanokukhubazeka abaqashwa emicimbini emikhulu. Yingakho abantu abanokukhubazeka bencamela ukuhlala emakhaya, bengayihambeli imicimbi ngoba bayazi ukuthi ababhekelelwe,” kuphetha uThabani.

Abanye abazobe benandisa kulo mcimbi uJoe Nina, Sgwili, Nomthi Sishi, Cyril Mbongwa, The Green Barrets, Bob90& The Bonos noFiso.

“Amathikithi aseyatholakala kumaComputicket ngoR120,” kuphetha uThabani.