UMthembu uvikela uRamaphosa
USOTSWEBHU we-ANC, uMnuz Jackson Mthembu, usole amaqembu aphikisayo ngokuthanda ukubukwa nodumo emuva kokuthi ephakamise ukuthi uMengameli Cyril Ramaphosa ahoxe esikhundleni sakhe ngokukhohlisa isizwe nePhalamende.
URamaphosa watshela amalungu ePhalamende ukuthi indodana yakhe, u-Andile yakhokhelwa yiBosasa ngomsebenzi eyayiwenzile kodwa wasihoxisa lesi sitatimende emuva kokuthola ukuthi iBosasa yayixhasa umkhankaso wakhe wokhetho ngesikhathi ifaka imali kwiakhawunti yomkhankaso.
Amaqembu aphikisayo athe uRamaphosa akathembekile ngakho kufanele ahoxe esikhundleni sakhe ngoba ukhohlise isizwe nePhalamende lapho afunga khona ukuthi akasoze aqambe amanga.
Izolo uMthembu utshele izintatheli ukuthi uMengameli akakaze aqambe amanga, amaqembu aphikisayo kufanele afake isikhalo ehhovisi likaSomlomo wePhalamende uma enobufakazi obuphathekayo.
“Amaqembu aphikisayo awanabo ubufakazi obuphathekayo bokuthi uMengameli wakhohlisa isizwe. Ukube banobufakazi obuphathekayo ngabe sebecele uSomlomo ukuthi abanike igunya ukuze kube nenkulumompikiswano ngalolu daba bese beza nobufakazi bawo. Manje ngoba awanabo ubufakazi bokuthi uMengameli wakhohlisa isizwe balokhu benza izimemezelo emphakathini ngento engekho. Bafuna ukubukwa.”
Uthe kwakucacela noma wubani ukuthi uMengameli wakhuluma iqiniso ePhalamende ngolwazi ayenalo ngesikhathi ephendula futhi yingakho ethe uma esethola eminye imininingwane wazisa iPhalamende.“Amaqembu aphikisayo kufanele ayeke ukuthanda ukubukwa.”