UBaxter unethemba koweLibya
UNGENE ezintangeni kwacaca nokuthi ucasha ngesithupha umqeqeshi weBafana Bafana, uStuart Baxter, ngesikhathi ebuzwa kuqondiswa ngqo kuyena ukuthi uma ehluleka wukufaka iqembu lesizwe kwi-Africa Cup of Nations (Afcon) ngonyaka ozayo uzobe usamfanele yini umsebenzi.
Selokhu ethathe izintambo ku-Ephraim “Shakes” Mashaba, uBaxter akakaze azifake agxile ezinhliziyweni zabathandi bebhola. Phakathi kwezizathu ezenza uBaxter angabi sezinhliziyweni zabaningi wukuthi ngesikhathi sokuqeqesha kwakhe iqembu linqoba imidlalo enzima bese likhala ngaphansi kwekulindele ukuthi ibe lula.
Ngaphandle kokuthi usanda kuqasha indodana yakhe kwesokuqeqesha onozinti, uBaxter unqobe kwiSeychelles ekhaya kodwa wehluleka ukwenza okufanayo esesekuhambeni. IBafana imi kabi kwi-log yeqoqo kweyokuhlunga njengoba isimelwe ukugwema ukuthi ingashaywa yiLibya emdlalweni ozokuba ngonyaka ozayo ekuhambeni.
Ngemuva komdlalo weNigeria obungempelasonto edlule iBafana ngeke iye eCameroon maphakathi nonyaka ozayo uma izokhala ngaphansi kwiLibya.
Ebuzwa ngamathuba eBafana koweLibya uBaxter uzwakalise ukuba nethemba kodwa inkulumo yakhe ibizwakala ukuthi akuyona eyokuzethemba ngokugcwele. Ngesikhathi ebuzwa ukuthi umsebenzi uzobe usamfanele yini uma ehluleka ukwenza okufanele eLibya, uthe naye uke azibuze lokho.
“Muhle impela umbuzo wakho futhi uwubuze ngesikhathi esikahle,” usho kanje kwabezindaba.
“Ukube bengiwumqashi wami kumbe ngisebenza kwabezindaba nakanjani bengizowubuza lowo mbuzo kumqeqeshi (uma singayi kwiAfcon). Bengizokubhekisisa futhi ukuthi sibheke phambili yini siyiqembu noma siyahlehla. Ngihlale ngizibuza nami ukuthi ngabe usangifanele yini umsebenzi.
“Kusemqoka ukuthi ngaso sonke isikhathi ngihlale ngizibuza ukuthi kwanele yini ukuba nabadlali izinsuku ezinhlanu bese ngibafundisa ngendlela konke abadinga ukukufunda. Ngokwami kufanele sonke esithintekayo sizibuze le mibuzo. Ngibona siya phambili kodwa kukhona ibhadi elikhona nje. Amanye amaqembu esinawo eqoqweni awanalo leli bhadi ngakhoke angazi,” usho kanje lizwakala izwi ukuthi liyavevezela.
Ukushilo ukuthi uya ngomqondo wewini eLibya ngoba uyazi ukuthi ngisho angawufaka umqondo wokupaka ibhasi kodwa lokhu ngeke kwenzeke ngoba abadlali baseNingizimu Afrika abanawo lo mqondo.