IBanyana ethubeni leNdebe yoMhlaba
IQEMBU lesizwe laseNingizimu Afrika iBanyana Banyana selidinga ukunqoba umdlalo owandulela owamanqamu ukuze kusheshe kufezeke iphupho leminyaka lokuya kwiNdebe yoMhlaba.
IBanyana izifake kowandulela owamanqamu kwi-Women Africa Cup of Nations (AWCON) ngemuva kokubhudluza i-Equatorial Guinea ngo 7-1 emdlalweni wesibili kuGroup B eCape Coast Stadium ngoLwesithathu ebusuku.
Amagoli eqembu likaDesiree Ellis, ashaywe uThembi Kgatlana amabili, Refiloe Jane, Nothando Vilakazi, Amanda Mthandi, Jermaine Seoposenwe, nephenathi kaLinda Motlhalo. Ele- Equatorial Guinea lishaywe u-Elena Nkuandum.
Elakuleli eliqhwakele kuGroup B ngamaphuzu ayisithupha, lizodlala neZambia emdlalweni wokugcina wamaqoqo kusasa ngo-6 ntambama. Ngosuku olufanayo i-Equatorial Guinea idlala neNigeria eshaye iZambia ngo 4-0.
Uma iBanyana iqeda phezulu eqoqweni, kowandulela owamanqamu izobhekana noyedwa phakathi kweGhana, Mali neCameroon abadlale izolo ebusuku. Uma inqobile kowandulela owamanqamu izoya okokuqala kwiNdebe yoMhlaba eseFrance ngonyaka ozayo. Uma ihluleka indlela yokuthola ithikithi kuzoba wukunqoba umdlalo wokuhlungela indawo yesithathu kwi-AWCON.
U-Ellis, ekhuluma nabezindaba ngemuva kokugwaza ibhece kwiEquatorial Guinea, uthe alikho iqembu okumele balibukele phansi. “Esiwombeni sokuqala bengibona sihlulwa. (Abadlali) Bebetatazela bengenzi lokhu esikwaziyo okuwukugcina ibhola phansi. Sishaye amagoli amabili kodwa sadedela elilula. Sikhulumile (ngesikhathi sekhefu) sabuya sivuselelekile ngoba kumele sikuqonde ukuthi uma sizimisele ngokuzuza esizibekele khona okuwukuya kwiNdebe yoMhlaba alikho iqembu okumele sileye,” kusho u-Ellis kwi-Cafonline.
Uthe usafuna ukubona ezakhe zidlala ibhola elingcono kunalokhu okusabonakele. “Siyajabula ngomphumela kodwa sisengenza kangcono kakhulu kunalokhu.”