Umlando iBaroka izifaka kowamanqamu
KUQOPHEKE umlando iBaroka FC izifaka kowamanqamu weTelkom Knockout okokuqala ngqa emlandweni ezowudlala ne-Orlando Pirates ngoDisemba 8 eNelson Mandela Bay Stadium, eBhayi.
Kusukela iPirates inqobe iNedbank Cup ngo-2014, isidlale kweyamanqamu eyisithupha kodwa lutho ukunqoba. Ngo-2014 idlale kowamanqamu weTelkom neMTN8 kodwa kwabheda ekugcineni. Ngonyaka olandelayo ishaywe kowamanqamu weConfederation Cup nakwiMTN8. Iminyaka emibili elandele lapho iPirates idlale iMTN8 neNedbank Cup kweyamanqamu kodwa nakhona kwanganqobeka.
IWits ifike kulo mdlalo ngenxa yokuguqisa iMaritzburg United ngo 2-1 ekuhambeni kanti iBakgaga ishaye ompetha beligi iMamelodi Sundowns ngo 2-0.
Kuyathusa ukuthi iBaroka isihambe yaze yafika kuleli zinga kwiTelkom uma uzoqaphela ukuthi emidlalweni yeligi isanqobe emibili kuphela. Ibiqala futhi iBaroka ukuzithola ikowandulela owamanqamu kusukela yasungulwa njengoba idlulele phambili.
IWits iyona eqale lo mdlalo ithwelwe ngeqoma ngoba emidlalweni emihlanu edlule la maqembu ehlangene, ibingakaze ikhale ngaphansi kwiBaroka. Ibiwine emine yadlala ngokulingana kowodwa.
Ngemuva kokunqoba kwiMaritzburg kwiTelkom, iWits ikhale ngaphansi kowokugcina weligi ngaphambi kwekhefu lemidlalo yeFifa kwiBloemfontein Celtic. Lowo bekuyiwona kuphela umdlalo abashaywe kuwona abafana bakaGavin Hunt. Okunye obekubenza bathwalwe ngeqoma kulo mdlalo wukuthi kwiTelkom Knockout, iWits igcine ukushaywa yiFree State Stars ngo-2016 (okuzitolika ngokuthi bangene kulo mdlalo sebeyinqobe yonke imidlalo eyisithupha edlule kulo mqhudelwano). IWits ishaywe nge-free kick kaMatome Mabeba ayivalele enethini ngomzuzu wesishiyagalombili. Kufanele ukuthi kwehle kahle lokhu kuMilutin Sredojevic oqalayo ukufaka iBucs kowamanqamu njengoba kowamanqamu bezobhekana neqembu elingenamlando wokunqoba izicoco.