Isikhulu siboshwe phakathi kwamabili
SEKUQUBUKE indida ngokuboshwa kwesikhulu sikaMasipala waseZululand esimisiwe emsebenzini ngoba sisolwa ngokubulala ikhansela le-IFP.
Isikhulu kuthiwa siboshwe phakathi kwamabili izolo emzini waso osoLundi ngoba sisolwa ngokubulala uMnuz Sbuyiselo Dlamini kulo nyaka emgwaqweni u-R66. Kusolwa ukuthi ababulali bakhe bangaphakathi kwi-IFP.
Ukuboshwa kwesikhulu kudale umsindo amanye amakhansela aseZululand avuka indlobane ethi abona sengathi siboshelwa amanqina enyathi.
“Okokuqala le nto isiyasidida ukuthi yenzeka kanjani ngoba uboshwa nje kufanele ayovela enkantolo ngenyanga ezayo mhlaka-10 ngokumiswa kwakhe emsebenzini. Nalo icala siyazi ukuthi uzofike alinqobe abuye azosebenza ngoba sekuphele unyaka esekhaya. Asazi ngempela ukuthi amaphoyisa kaBheki Cele asebenza kanjani. Okokuqala umuntu owenze lokhu uyaziwa, sekuze kwaba kathathu igama lakhe livela,” kusho elinye ikhansela le-IFP elingathandanga ukudalulwa.
Izolo amakhansela aseka isikhulu abehla enyuka eyosikhiphela imali ebhange ukuze sikwazi ukuthola ummeli. Isolezwe likhulume nesikhulu ocingweni izolo sathi sisesiteshini samaphoyisa KwaDukuza.
“Angazi kwenzekani. Amaphoyisa afike ebusuku phakathi kwamabili abulala izinto elwa nami. Aqale athi mina nabaqaphi bami sinesibhamu esingekho emthethweni. Emuva kwalokho ahambe nami athi ngiboshelwa indaba kaDlamini,” kusho isikhulu igama laso elisagodliwe kuze kube sivela enkantolo.
Into edida abaningi wukuthi kuke kwasabalala amahlebezi okuthi kuboshwe iMeya yaseZululand, uMfundisi Thulasizwe Buthelezi, kodwa okwathi uma ethintwa yiSolezwe waveza ukuthi usemsebenzini akazi amahlebezi avelaphi.
Okhulumela amaphoyisa KwaZulu-Natal, uLT Colonel Thulani Zwane, uthe abavumelekile ukuphawula ngalolu daba kodwa akuthintwe uBrigadier Vishnu Naidoo.
UNaidoo uthe usemhlanganweni wacela ukuba athunyelelwe isms ngalolu daba.
Kuthe uma esethunyeleliwe akangabe esatholakala ocingweni ngoba bese luvaliwe.
Kuze kwashaya isikhathi sokushicilela engatholakali.