UPaez ngeke abonwe kweyeCAF
PHEZU kokuthi umqeqeshi weKaizer Chiefs, uGiovanni Solinas, ethembise ukuthi uzonika ithuba nabanye abadlali ngenxa yokucinana kwemidlalo njengoba kuqala iCAF Confederation Cup kodwa umgadli waMakhosi, uGustavo Paez ungomunye wabangeke balithole lelo thuba lokubonakala kulo mqhudelwano.
UPaez, uBhongolwethu Jayiya, Kgotso Moleko noJoseph Molangoane olimele abekho eqenjini labadlali abawu-24 ababhaliswe yiChiefs kwiCAF.
Esitatimendeni esikhishwe yiqembu, lithe lizobuye lizigcwalise izikhala ezisele.
“Iqembu linqume ukungazivali zonke izikhala zabadlali njengoba lisekhona ithuba lokubuye libabhalise ngokuhamba kwesikhathi,” kusho isitatimende.
UPaez, odabuka eVenezuela wagcina ukudlala kwiChiefs ngesikhathi ibhekene neBlack Leopards kwiTelkom Knockout eFNB Stadium ngo-Okthoba 21. Lo mdlali wagila izimanga kwiMacufe Cup bebhekene neBloemfontein Celtic.
Kulowo mdlalo uSolinas wamkhipha esiwombeni sesibili. Kwabonakala kwaba yisenzo esamcasula uPaez njengoba enqaba ukuxhawula kodwa wabuye waxolisa ngokuduba umqeqeshi.
Ushiywa ngaphandle nje sezike zavela izinkulumo ezithi iqembu lingase limkhulule.
UJayiya yena uke awathole amanenjana okudlala eqenjini kanti uMoleko unikezwa ithuba eqenjini leMultichoice Diski Challenge.
“NgoDisemba sizoba nemidlalo eminingi. Kuzomele sishintshe isikwati ngoba sinababo abadlali abasezingeni eqenjini nabo okumele bafake isandla,” kusho uSolinas.
IChiefs ivula imidlalo kwiConfederation neZimamoto yaseZanzibar emdlalweni onamuhla eNelson Mandela Bay Stadium ngo7.30 ebusuku.
Umlenze wesibili walo mdlalo wokuhlunga usekuhambeni ngoDisemba 4-5. Uma EzikaSolinas zidlula lapha zizoqhubekela esigabeni esilandelayo sokuhlunga, okuzobe sekufanele kusale amaqembu awu-16 azongena kumaqoqo.
IChiefs yanqoba lo mqhudelwano ngo-2001 usabizwa nge-African Cup Winner’s Cup. Kusukela lapho ayenzi kahle emiqhudelwaneni yeCaf.
Ihlulekile ukungena esigabeni samaqoqo idlala kwiChampions League ngo-2014 ihlulwa yi-AS Vita ngo-2015, ishaywe iRaja Casablanca nango-2016 yakhishwa yi-Asec Mimosa.
“Njengamanje iKaizer Chiefs ibekwe endaweni ka-18 ekuklelisweni kwamaqembu ase-Afrika. Kufanele siyibuyisele kwiTop 5 okuyilapho efanelwe ukuba khona,” kusho uSolinas. Imidlalo yeCaf Namuhla Champions League: Orlando Pirates v Light Stars (7.30pm, Orlando Stadium); Leones Vegetarianos v Mamelodi Sundowns (3pm, Estadio de Ebebyini).
Confederation Cup: Kaizer Chiefs v Zimamoto (7.30pm, Nelson Mandela Bay); Free State Stars v Mukura Victory Sports (3pm, Bidvest Stadium).