I-Bucs izodlala oweCAF idlubhe elisha
IZODLUBHA ijezi elisha elimhlophe qhwa kuhle kwamalanda i-Orlando Pirates, emdlalweni wayo weCAF Champions League ezowudlala namuhla neLight Stars yaseSeychelles.
Lo mdlalo uzoba se-Orlando Stadium, ngo-7.30 ebusuku. Ngokusho kukaFloyd Mbele oyisikhulu esiphezulu kweZimnyama, leli kuzoba yijezi labo lesithathu njengoba benelimnyama nelibomvu.
Echaza uthe ukwethulwa kwaleli jezi kuhambisana nomgubho wabo njengeqembu weminyaka ewu80 lasungulwa nokuthi kuzobe kungokokuqala eminyakeni emihlanu iPirates idlala kwiCAF Champions League.
“Asikho isimanga esitheni ngaphandle kokuthi kuhambisana nokubuyela kwethu emqhudelwaneni iCAF Champions League,” usho kanje uMbele exoxa naleli phephandaba.
IPirates ingelinye lamaqembu amabili akuleli asenqobe isicoco seChampions League. EZimnyama zinqobe lesi sicoco ngo-1995. Ngo-2013, zehlulwa kowamanqamu zishaywa yi-Ahl Ahly yase-Egypt.
Elinye iqembu elisanda kuphakamisa ifulegi laseNingizimu Afrika linqoba lo mqhudelwano yiMamelodi Sundowns ekhale yamuka nalesi sicoco ngo-2016. “Sibhiyozela iminyaka engu-80 njengeqembu neminyaka emihlanu sagcina ukudlala kwiCAF Champions League. Sibone kungcono senze ijezi elihle esibungaza ngalo konke okuhle okwenzeke emlandweni waleli qembu,” kusho uTokoloho Moeketsi okwezokukhangisa kwiPirates.
UBob Maphosa oyisikhulu esiphezulu kwa-Adidas uchaze leli jezi leZimnyama njengelihambisana nesitayela sesimanje.
“Leli kuzoba yijezi lesithathu leBucs. Sibeke phambili umlando weqembu omuhle kakhulu saphinde sabuka ingqephu yesimanje sase sikuhlanganisa kokubili kwaphuma unqambothi,” kusho uMaphosa.
Elinye iqembu elidlala namuhla kwiChampions League yiSundowns ezotholana phezulu neLeones Vegatarianos FC yase-Equatorial Guinea. Umdlalo uzoqala ngo-3 ntambama e-Estadio de Ebebiyín eMalabo. Imidlalo ye-Absa Premiership: Namuhla: Bloemfontein Celtic v SuperSport United (Dr Molemela Stadium, 7.30pm)
Chippa United v AmaZulu (Nelson Mandela Stadium, 8pm)