Kushone obewumgogodla wesiteshi somphakathi
ABALALELI besiteshi somphakathi saseMpangeni namaphethelo, iNdonsakusa Community Radio (Icora) 100.0 FM, bafe olwembiza ngokudlula emhlabeni komunye wabasakazi nabaphathi abawumgogodla wesiteshi, uSimphiwe ‘Lady S’ Sibiya (35).
USimphiwe, odabuka eMvutshini eGingindlovu kodwa obesezinze eSikhaleni, ushonele esibhedlela saseGarden Clinic eMpangeni ngoLwesibili ngezithuba zabo 8.30 ebusuku, ngemuva kokuphuthunyiswa khona exinwe wukugula.
Umphathisiteshi we-Icora, uBonga Msweli, uthe bagqemeke udume lwengozi ngokushona kukaLady S.
“Ubenamagalelo amakhulu emsakazweni. Silahlekelwe ngempela. Akagulanga isikhathi eside. Ufike esiteshini ezoba yiHuman Resources and Administration Manager ngo-2014.
“Ngenxa yokubona ikhono lokusakaza, ube esethola ukuqeqeshwa kwangaphakathi nokwangaphandle. Ngo-2016 ube esesakaza uhlelo lwangoMsombuluko kuya kuLwesine phakathi kuka-9 no-12 ebusuku olwaluthi Bedroom Power Play,” uMsweli.
Kuthe ngo-2017 uLady S wafakwa esikhundleni sokuba yimenenja yezinhlelo, isikhundla ahambe esasibambile.
“Ngenxa yokuthi abantu bebemthanda, kwaphoqeleka ukuthi simnikeze uhlelo lwangeSonto ntambama oluthi Sunday Sounds,” kuphetha uMsweli.
USihlalo webhodi labaqondisi bomsakazo, uQaphile Putsoane, uthe bazomkhumbula kakhulu uLady S ngenxa yokuphatha ngobuchule izinhlelo zomsakazo.
ULady S uzofihlwa emathuneni aseMvutshini, eGingindlovu, ngaseShowe, ngoMgqibelo ekuseni ngemuva kwenkonzo ezokuba sekhaya. kusho