Inkantolo igodle isinqumo ngenduku
INKANTOLO yoMthethosisekelo isigodlile izolo isinqumo mayelana nokuthi abazali bangazishaya yini izingane zabo emakhaya.
Inhlangano engenzi nzuzo iFreedom of Religion South Africa (FOR SA), ibisenkantolo ifuna abazali bavunyelwe ukuthi bashaye izingane zabo.
UMnyango wezeNhlalakahle yomphakathi nowezoBulungiswa iyaphikisana nokuthi kushaywe izingane.
Ummeli weFOR SA, uMnuz Reg Reg Willies uthe abazali kumele bavunyelwe ukuthi baqondise izingane zabo ngendlela ababona ngayo.
Uthe kukhona umehluko phakathi kokuyiqondisa ngokothando noma ukuyihlukumeza.
Le nhlangano ifuna kuchithwe isinqumo seNkantolo eNkulu eyachitha ukushaywa kwezingane.
Izolo kube nemibono ehlukene ezinkundleni zokuxhumana njengoba abanye bebezwakalisa ukuhambisana nokuthi abazali bavunyelwe ukuthi baqondise izingane zabo ngendlela ababona ngayo. Ijaji Raylene Keightley wanquma nyakenye ukuthi akukho emthethweni ukushaya ingane. UKeightley wayelalele udaba lukababa waseGoli owalahlwa yicala ngokushaya indodana yakhe. Emaphepheni afakwe nguMnuz Michael Swain, umqondisi weFOR SA, uthe isinqumo sikaKeightley sashiya abazali bengenazo ezinye izindlela zokuqondisa izingane. “Sikhathazekile ngokuthi lesi sinqumo sizophuca amandla abazali ikakhulu labo abahlala emakhaya agcwele kakhulu ngoba abakwazi ukuthumela ingane ekhoneni elithile ngoba igangile.”
Obemele uMnyango wezeNhlalakahle uMnuz Nkosinathi Dladla, uthe izingane kumele zivikelwe odlameni.
Emaphepheni afakwe yiChildren’s Institute, Quaker Peace Centre neSonke Gender Justice, aseka isinqumo senkantolo enkulu sokuchitha ukushaywa kwezingane.
Ungoti wezingane uNksz Shanaz Mathews uthe noma engabaphuci abazali ilungelo labo kodwa kumele benze izinto ngendlela ehlukile.
Uthe ucwaningo lwakamuva luveza ukuthi abantu abasha abangu-71% e-Eastern Cape sebake balithola ibhande noma induku besayizingane.
UNksz Carol Bouwer, umqondisi wePeace Centre, ongahambisani nokushaywa kwezingane, uthe bafuna kungavunyelwa ukushaywa kwezingane.
Uthe kabasho ukuthi abazali abangaziqondisi izingane zabo kodwa abakwenze lokhu ngaphandle kwenduku.
I-The UCT Children’s Institute ithe ukushaywa kwezingane kuba nomthelela omubi ezinganeni.