Kumiswe imenenja kaMasipala eNdumeni
KUPHAZAMISEKE ukwethulwa kwemibiko ebucayi yenkohlakalo eNdumeni, eDundee ebizokwethulwa imenenja kamasipala ngenxa yokuthi ivele yamiswa emsebenzini ngezinsolo zokuzama ukushaya.
UMnuz Sya Ntuli umiswe izolo umkhandlu wamakhansela ngoba esolwa ngokungaziphathi kahle nokuzama ukushaya ezinye izikhulu nokuthuka abanye abasebenzi.
USomlomo waseNdumeni, uMnuz Lucky Khumalo uthe ayikho into abebengayenza kodwa baphoqelekile ukuba bamumise esikhundleni uNtuli.
“Mathathu amacala amiselwe wona. Elokuqala elokubonakala kwivideo ezama ukushaya abasebenzi ebathuka. Elinye elokuzama ukushaya esinye sezikhulu kumasipala uMnuz Lwazi Cindi. Bese kuba elokuhluleka ukuziphatha ngendlela okhethweni lomkhandlu lapho abonakala eziphathisa okukasopolitiki,” kusho uKhumalo.
Uthe bakwenze lokhu ngokululekwa uMnyango wezokuBusa nokuBambisana neziNdaba zoMdabu KwaZulu-Natal.
Uveze ukuthi baqoke uMnuz Blessing Sthembiso Mthembu ukuba abambe kulezi zinyanga ezintathu kuze kuphothulwe uphenyo.
UNtuli uthe bekufanele ethule kulo mhlangano izincomo ngemibiko ebucayi yenkohlakalo nokuthi obani abavulele amacala kodwa useyavinjwa ngokumiswa emsebenzini.
“Konke lokhu abakushoyo akukho ngoba bazama ukungivimba ukuba ngingadaluli okushiwo umbiko woMnyango wezokuBusa nokuBambisana neziNdaba zoMdabu, owethu wangaphakathi nokaMcwaningi Mabhuku Jikelele ophenya izinqe amakhansela athile nezikhulu ebezikhwabanisa ngezinkampani zazo eNdumeni,” kusho uNtuli.
Uthe usezimisele ukugeqa amagula ngoba ukumiswa kwakhe kuyingxenye yokuba kugqekezwe ihhovisi lakhe ukuze kwebiwe imibiko edalula inkohlakalo.
Uveze ukuthi abanye usebavulele amacala emaphoyiseni ngokuya kulo ikomiti elibheke ukusebenza kwezimali zikamasipala.
Uthe ngisho leli komiti livalelwa ngaphandle ukuba lizochaza ngezinyathelo ezithathiwe kwabasolwa ngenkohlakalo.
Uthe kumanje kunamakhansela zikasomabhizinisi ezingamaBMW naye obalwa kule mibiko yokwebiwa kwezigidi zamaRandi eNdumeni.
UNtuli uthe selokhu le mibiko iphumile uvinjwa ngenqwaba yamaphoyisa kamasipala nabaqaphi ukuba angangeni azosebenza njengoba sekugcine ngokuthi amiswe.