Okufunwa yiCosatu kwi-ANC
NJENGOBA iCosatu izokhankasela ukuwina kwe-ANC okhethweni lwangonyaka ozayo, lo mfelandawonye ufuna ukuthi izikhalo zabasebenzi zibe yingxenye yomqulu wokhetho wale nhlangano.
Lokhu kuvezwe nguNobhala jikelele weCosatu uMnuz Bheki Ntshalintshali izolo ekhuluma nabezindaba ngemuva komhlangano wesigungu esiphezulu salo mfelandawonye.
UNtshalintshali uthe ingqungquthela yeCosatu yakubeka kwacaca ukuthi kumele kwesekwe i-ANC okhethweni lukazwelonke.
“Zonke izinyunyana ezingaphansi kweCosatu kumele zenze izinhlelo zokuthi i-ANC iwine ukhetho. Sifuna ukuthi izikhalo zabasebenzi zibe yingxenye yosomqulu wokhetho,” kusho uNtshalintshali.
Uthe bahlabe ikhwelo lokuthi kumiswe ukudilizwa kwabasebenzi kuleli.
“Sizohlelela umbhikisho kazwelonke ozoba ngoFebhuwari 13 ngonyaka ozayo wokuphikisana nokudilizwa kwabasebenzi. Sesikhulume sakhathala kukodwa okusele ukulwa nalokhu, ukungena emgwaqweni,” kusho uNtshalintshali.
Uthe akwamukelekile ukuthi imikhakha ezimele ayisebenzisi uhlelo lwango-2012/2013 lokuthi ngeke ibanjelwe intela enkulu ukuze yonge imisebenzi okunalokho kwakhiwa inzuzo ngokudiliza abasebenzi ukuze kuthengwe imishini. Kulesi sithangami kumenyezelwe ukuthi umgubho wosuku lwabasebenzi, iMay Day, ngonyaka ozayo uzoba KwaZulu-Natal.
Lo mgubho oba minyaka yonke ngoMeyi 1, uba semadolobheni ehlukene.
Unxuse noMengameli Cyril Ramaphosa ukuthi angawusayini uchatha ka-4% wokunyusa amaholo ongqongqoshe, amajaji, osomlomo nabanye abantu abahola kakhulu.
“Akukwazi ukuthi kungasayinwa ukuthi laba bantu banyuselwe imali ngo-4% ekubeni abasebenzi behlupheka. Siyamnxusa uMengameli ukuthi angasayineli ukunyusa amaholo,” kusho uNtshalintshali.
ICosatu ikwamukele ukusayinwa komthetho weholo eliphilisayo.
Igxeke noRamaphosa ngokuhudula izinyawo ngokusayinela iNational Health Insurance (NHI).
Ithe ibona sengathi umthethosivivinywa weNHI usekude ukuphothulwa njengoba kukhona abahudula izinyawo.
UNtshalintshali uthe ababoshwe abathinteka ekudliweni kwemali ebhange iVBS. THUMELA umbono ngalolu daba kuFacebook (Isolezwe), kuTwitter (@isolezwenews) noma umqhafazo ku-45773. I-sms ibiza R1,50.