Bakhala ngesihluku sabeSikebhe
KUYAKHALWA ngokusebenza kwenhlangano elwa nobugebengu, iSikebhe eZululand. Sekunezinsolo ezithi abantu sebeyasisebenzisa ukuhlasela izitha zabo ngaso.
Kumanje kuthiwa sekuvulwe amacala esiteshini eMahlabathini ngenxa yezigameko zabantu baseNhlungwana abashawe iSikebhe.
Muva nje kusabalale i-video ezinkundleni zokuxhumana yowesilisa osekhulile obekhulekwe esihlahleni eshawa ngamalungu eSikebhe phambi komphakathi.
Kuthiwa amanye amalungu omphakathi aseyesaba ngoba umuntu uma ekuzonda, kuthiwa usevele akubike eSikebheni njengomuntu ogangile ukuze ushawe.
“Sinovalo ukuthi le nto izodala inzondo enkulu ngoba sekukhona abasebenzisa iSikebhe ukuhlasela abantu kodwa bengenze lutho,” kubalisa ilungu lo mphakathi elicele ukungadalulwa.
Ephawula uSihlalo weSikebhe, uMnuz Joseph Manyathi uthe: “Laba bantu baphethwe wukweba. Sebekhathazile futhi bahlale bekhuluma kabi ngeSikebhe. Zonke leziya zindawo zakoLundi Nongoma bayaganga batshontsha nezinkomo zeSilo. Ayikho le nto abayishoyo.”
Okhulumela uMnyango wezokuPhepha KwaZulu-Natal, uMnuz Kwanele Ncalane uthe bashaqeke kakhulu ngalesi simo.
“ISikebhe siyingxenye yezinhlangano ezibambisene nomnyango ukulwa nobugebengu. Ngakho uma sekukhona ukuhlukunyezwa kwamalungelo abantu kufanele abathintekayo bavule amacala emaphoyiseni. Umsebenzi weSikebhe ukuthatha osolwayo ayiswe emaphoyiseni ngaphandle kokuba ashawe,” kusho uNcalane.
Uthe uMnyango wezokuPhepha uhlela ukuya eNhlungwane uyobheka isimo ukuze kunqandwe isimo abantu abakhala ngaso.
Iqembu iNFP liveze ukuthi lithukile ngalolu daba njengoba omunye wabaholi balo, uMnuz Sphamandla Ntombela ezizwele ngokwakhe ngesimo esenzekile.
“SiyiNFP sifisa kubuyekezwe ukusebenza kweSikebhe. Sesibukeka sihlukumeza abantu futhi sithatha umsebenzi wamaphoyisa, bakhanda inkantolo yasehlathini. Abasalwi nokwebiwa kwemfuyo kodwa sebengena nezinto ezingahlangene nemfuyo. Kunalokho sebeshaya abantu ngaphandle kokubheka ubuqiniso bento abasuke besolwa ngayo. Sicela bonke abashaywe yiSikebhe beze ngaphambili emaphoyiseni babike ngokushaywa kwabo. Akekho onelungelo lokushaya umuntu futhi kunophiko emaphoyiseni olulwa nokwebiwa kwemfuyo, ngakho abasolwayo abadluliselwe kulo,” kusho uNtombela.
Uthe abahambisani nokwebiwa kwemfuyo ngoba iyifa, bafundisa ngayo izingane bondle imindeni.
Amaphoyisa esifundazweni athunyelwe imibuzo ngalezi zinsolo kodwa akhala ngokuthi ayikho imininingwane ayitholayo mayelana namacala avulelwe iSikebhe.