Masihlukaniselwe ebhange isitokofela ukugwema ingozi
NGOMSOMBULUKO kudutshulwe kwabulawa amadoda amathathu eClermont, eThekwini, abephuma ukuyokhipha imali yesitokfela abezoyihlukanisa.
La madoda adutshulelwe emotweni abehambe ngayo kanti eyesine abehamba nayo isindile yaphuthunyiswa esibhedlela. Izigebengu eziwahlaselile zishaye zachitha noR28 000.
Ngawo futhi uMsombuluko kuboshwe amadoda amabili abedubule owesifazane ethangeni ase emphuca uR80 000 wesitokfela eDundee.
Lona wesifazane uhlaselwe esekwakhe emini kade ephuma ebhange ukuyokhipha le mali. Izigilamakhuba zijahiwe zabanjwa kanti nemali itholakele.
Izigemegeme ezihambisana nokuhlukaniswa kwezitokfela yinto ejwayelekile ngalesi sikhathi sonyaka ngoba yisona sikhathi izitokfela eziningi ezihlukanisa ngaso.
Nokho lokhu kokuthi kugcine sekuphume umphefumulo akuvamile futhi kuyadabukisa kakhulu. Sithi ayiduduzeke imindeni yabashonile kanti siyathemba nalona osesibhedlela uzolulama agcine ephumile.
Ukuhlaselwa kwabantu bephucwa okungokwabo akwamukelekile futhi akusoze kwaxoleleka. Siyakuqonda futhi nokuthi kulikhuni ukushintsha into umuntu aseyijwayele.
Kodwa njengoba izigebengu zingazibekile phansi, sesifikile ngempela isikhathi sokuthi izitokfela zivume ukuthi imali ziyihlukanisele ebhange ifakwe kuma-akhawunti amalungu kunokuthi zithathe isamba ngoba lokhu kuya ngokuya kuba yingozi kakhulu kunakuqala.
Siyazi ukuthi lokhu kuyisicefe futhi mhlawumbe kubulala nomdlandla nomoya wokubungaza ndawonye uma sekuhlukanisiwe kodwa cishe kungcono lokho kunokuthi amalungu esitokfela aqhubeke nokubeka impilo yawo engozini.
Sesikushilo lokho futhi sicela amaphoyisa ababhekisise abasebenzi basemabhange uma esuke ephenya amacala alolu hlobo ngoba kufanele kubhekwe ukuthi abekho yini kubona abadayisa ngamalungu ezitokfela ngoba izigebengu zazi ngani ukuthi abantu basuke bephethe isamba semali.
Kuyaziwa ukuthi kwesinye isikhathi umkhuba usuke usekhaya kuwona amalungu esitokfela kodwa kumele nabamabhange babhekisiswe.