Umuntu omnyama akazwani nokuthuthukisa into yakhe
MASOLEZWE niyoze ningizwe uma ngithi thina bantu bomdabu singomagangane okufanele bahlale beqashelwe ngeso lokhozi ngoba sicekela phansi izinto. Yebo ngiyavuma ukuthi nabelungu banakho ukuganga kwabo okungaba ukukhwabanisa imali okuhambisana nemikhonyovu yokufuna ukuzicebisa. Kuyiqiniso elingephikwe ukuthi ziningi izikhungo zentuthuko ezasungulwa ngabelungu ezisasebenza nanamuhla .Ngokunjalo namandiya anakho ukukhohlakala okuningi okufanele ukuqaphele uma usebenzisana nawo ngoba angakushiya uncela isithupha.
Yize egange enjalo amandiya kodwa zikhona izikhungo zamabhange esezibe khona iminyaka ezasungulwa ngamasulumane. Uma kuthiwa abantu abamnyama bayaganga baganga uze ubone ukuthi bashoda ngezimpondo zikasathane. Ukucekelwa phansi kwebhange iVBS kuwubufakazi bokuthi thina bomdabu asigangi njengezinye izizwe kodwa singomashayabhuqe abafuna ukushanela kusale kungekho lutho oluyosiza izizukulwane. Ukuwa kweVBS kusishiye izinqa zivele obala ngoba asikwazi ukuqamba amanga sithi liwiswe wubandlululo okanye abelungu abazonda umuntu omnyama.
Thina bomdabu kufanele silivume iqiniso lokuthi izinto ezisungulwe yithi aziphili isikhathi eside, uma kwenzekile zaphila isikhashana ziba nezinkinga ezixakile njengemboni yamatekisi. Sikhuluma nje kunombuzo ongaphenduleki wokuthi kungani osomatekisi bengasunguli amagaraji okwetha uphethroli ngoba yibona abawusebenzisa kakhulu. Iqiniso wukuthi uma bengasungula amagaraji kungajika kubulawane sekukhona abafuna ukuthela uphethroli mahhala. Ngokomthetho kufanele engabe ososesheni bamatekisi banomasingcwabisane abaqondene nabagibeli ukuze basizakale uma beshone ngengozi bagibele amatekisi. Uma isimo sivuma kufanele engabe osomatekisi basungula imishuwalense yezemfundo eqondene nokusiza izingane zabagibeli abashone ezingozini zamatekisi. Ngokwenza lezi zibonelo okaVolos uzama ukukhombisa ukuthi umuntu omnyama akufanele angene ebhizinisini aqede angazihluphi ngokulithuthukisa ngenhloso yokwandisa nokugcina amakhasimende.
Bakwethu mina sengigeze izandla ngokuthi abamnyama bayoke bathande ukuzithuthukisa ngoba nabathakathi abasithakathayo abathuthuki. Uthola ukuthi umthakathi uthakatha ngemfene eyodwa ize iguge engenahlelo lokukhulisa encane ukuze aqhubeke nomsebenzi. UVolos ukholwa wukuthi kungekudala abathakathi bazosithakatha ngezimfene ezingamaFong Kong akhuliswe eChina ngoba abanahlelo lokuzikhulisela ezabo. Kuyiqiniso elingephikwe ukuthi abantu bayavilapha ukukhulisa imfuyo, uma uthi umuntu akafuye izinkukhu okanye izimbuzi uvele akhale ngokuthi zikhula kancane. Abantu abaningi bafuya ngengozi bengaqondile, uthole umuzi ugcwele amagundane namaphela azifuye ngenkani ngoba umuzi ungahlanzekile.
MaSolezwe siyazi sonke ukuthi sibathanda kanjani ogologo nobhiya, kuyihlazo ukuthi kuze kube yimanje asikwazi ukuzakhela into esithanda ukuyiphuza. Ngiyavuma ukuthi ikhona imizamo yokuzakhela utshwala bethu obufana nesiqatha nogavini. Inkinga ngalobu tshwala esizakhele thina isekutheni sibudidiyela ngezithako ezihangula imilomo ibe bomvu kube sengathi umuntu uqabule umlilo.